Arangkada of Leo Lastimosa for November 20, 2008

            TAWAG NI BARACK

 

            Labihang mingawa sa pahibawo sa buhatan ni US President-elect Barack Obama sa ilang panagsulti ni Pres. Arroyo.  Niang mubong press release sa Office of the President-Elect (change.gov) niadtong Nobyembre 17:  "President-elect Barack Obama today returned phone calls to three world leaders and expressed his appreciation for their congratulations on his election. President-elect Obama spoke with: President Saakashvili of Georgia; President Macapagal-Arroyo of the Philippines; and President Gul of Turkey."

            Pagmatuod unsay importansiya nga gihatag sa buhatan ni Obama sa tawag niyang Arroyo, wa hisguti unsay ilang gipanagsultihan.  Simbako moinsistir gihapon si Arroyo nga sikit silang Obama, gipahibawo sa laing press release nga sa samang adlaw gitawgan ni US Vice President-elect Joe Biden si Presidente Mikheil Saakashvili sa Georgia.

-o0o-

            Ang tawag ni Obama nahimo duha ka semana human sa iyang pag-isnab sa sunud-sunod nga mga tawag ni Arroyo niadtong Nobyembre 5 ug 6.  Samtang di ko modason sa pangagpas ni Kongresista Teddy Casino nga mahimong dugayng natawgan kay si Arroyo ang kataposan sa listahan (ang lista sa website ni Obama nagpakita nga si Arroyo ang ikaduha sa kataposan), ang pagpalabay ni Obama og duha ka semana nagmatuod unsa na lang gyod intawoy ranggo sa Pilipinas sa listahan sa mga alyado sa Estados Unidos.

            Saligi ang Malakanyang pagpaburot sa unod sa panagsulti nilang Obama ug Arroyo.  Matod ni Press Secretary Jesus Dureza nipasalig si Obama nga magpabiling lig-on ang relasyon sa duha ka nasud.  Apan ang buhatan ni Obama niklaro nga igo lang siyang nagpasalamat sa pahalipay ni Arroyo.

-o0o-

            Si Obama nahibawo gyod tingali nga lahi ang oras sa Pilipinas.  O kon labihan niyang lingaha pagpangita sa mga sakop sa iyang gabinete, may mga kaabag gyod tingali siya nga makahunghong sa nagkalainlaing time zones sa kalibotan.  Maong lisod tuohan nga di tinuyo ang pagtawag niyang Arroyo sa alas-3:17 sa kadlawon, oras sa Pilipinas.

            Kon nahuman na sa iyang pagsaulog nga sa kataposan gitapos nang Obama ang makauuwaw nga pag-isnab niya, mangahas ko pagsugyot ni Arroyo nga susihon unsay tinuod nga tuyo sa tawag ni Obama:  Pahalipay ba gyod?  O silot?

-o0o-

            Apan si Obama di mao ray magbinugtong pag-umol sa lagda sa iyang pamunoan alang sa Pilipinas.  Igo lang siyang mopatuman unsay mahukman sa US Congress, kansang mga sakop mas tang-an ug mas hawod pa niya.  Wa pa gani tingali siya mapahibawo nganong nikalit lag kahumot ang Sulu alang sa Washington.  Nga gawas sa paghimog kadalanan, nanambag nang US Embassy unsaon paghipos ang basura sa isla.

            Mao ni konsuylo ni Arroyo.  Unahon ni Obama ang krisis sa ekonomiya, inay ang gubat sa Iraq, o ang pagpanghilabot sa ubang kanasuran, di siya magtagad sa impeachment ni Arroyo.  Gawas lang kon mosuway si Arroyo pagbanhaw sa diktadurang Marcos.  [30]  leo_lastimosa@abs-cbn.com

Arangkada of Leo Lastimosa for November 19, 2008

            PIYESTA NI GLORIA

 

            Ang bisan unsang nahibilin nga pangindahay nga nagkahiusa pa ang oposisyon batok sa pamunoan ni Presidente Arroyo hingpit nang napusgay.  Dihang napalagpot si Senador Manuel Villar ug napulihan ni Juan Ponce Enrile isip pangu sa Senado.  Sa usa lang ka pamilok, nabantang nga hubo diay sa bisan unsang sukaranan ang paglaom nga inihap na lang ang mga adlaw ni Arroyo sa Malakanyang.

            Tungod sa panagtakdo sa kamapahimuslanon sa taga administrasyon ug sa politikanhong mga ambisyon sa taga oposisyon, nabisto nga ilusyon ra diay ang saad sa kausaban sa nasudnong liderato.  Mangandam na tang daan sa duha lang ka kahigayonan:  Kon di malugwayan ang termino ni Arroyo, iyang itoy maoy mopuli niya sa palasyo.

-o0o-

            Laing ilusyon nga nahukasan mao ang pagtuo nga ang taga oposisyon, sukwahi sa taga administrasyon, may mga prinsipyo nga gibarugan.  Ang kalit nga pagsalikway nilang Villar ug paggakos nilang Enrile nagmatuod nga wa silay kalainan sa mga nagtungkawo sa gahom nga ilang gisaway.  Managsama diay sila nga dali rang makausab sa ilang baruganan sama sa pag-ilis sama kasayon sa pag-ilis sa ilang gisul-ob.

            Mga itoy na lang tingali sa nibalitok nga mga senador ang motuo sa bag-o nilang pasalig nga magpabilin ang ilang pagsupak sa cha-cha ug ubang maniobra sa administrasyon bisan si Enrile nay ilang pangu.  Nahibaw-an na sa kadaghanan kinsay palabihon sa mga senador kon magkasungi ang mga interes sa ilang bolsa ug sa katawhan.

-o0o-

            Mirisi ni Villar.  Nagtuo tingali nga masunod niya si Arroyo nga nagpapating lang sa mga pasangil sa kahiwian ug magpabilin gihapon sa katungdanan.  Nadutlan siya kay di makapalihok sa kinatibuk-ang makinarya sa kagamhanan pagtabon niya.  O di sama kamaru ni Arroyo.

            Ang pagsukip sa P200 milyones sa nasudnong budget sa 2008 alang sa proyekto nga makapalambo sa iyang yuta maoy pabilo sa bomba nga nibungkag sa kaligdong ni Villar.  Ang dugay kaayo niyang pagpadakop ni Heneral Eliseo dela Paz ug lubay nga pagsikop ni Joc-Joc Bolante wa katabang sa iyang kawsa.

-o0o-

            Labing dakog ngisi si Arroyo sa salida.  Gawas nga gitawgan na siyang US President-elect Barack Obama, maduwa-duwaan na niyang Senado.  Ang tinago nga pagsaulog sa Malakanyang sa pagkapukan ni Villar ug pagkapili ni Enrile nibuhagay sa publiko tungod sa pangaliya ni Press Secretary Jesus Dureza nga padayong mangu si Arroyo lapas sa 2010.

            Kon hangtod karon may naglaom pa nga ang mga senador makapasiugda og makiangayong kausaban, susiha ang katin-awan sa duha lang nga nibukobuko ni Villar:

·        Si Jinggoy Estrada, nga nagpabiling President Pro Tempore, nitalikod ni Villar kay kumbinsido nga si Enrile hangtod karon fan pa gihapon sa iyang amahan nga si Erap; ug

*      Si Lito Lapid niingon nibotar siya uban ang pagtuo nga human sa resignasyon ni Villar automatic nga mopuli si Enrile.  [30]  leo_lastimosa@abs-cbn.com

Arangkada of Leo Lastimosa for November 18, 2008

            ISNAB NA SAB

 

            Si Pres. Arroyo ang usa sa labing una nga nihangop sa awhag ni US Pres. George Bush pagpatawag og kalibotanong tigom pagtuki sa ekonomikanhong krisis.  Matod ni Arroyo dako og mahimo ang summit pag-umol og kalibotanong tubag sa krisis.  Matod niya dako ang matampo sa Pilipinas atol sa global summit.

            Way nahibung sa dakong interes ni Arroyo sa summit.  Ekonomista siya ug mahimong tinuod gyod nga may ikatampo pagsulbad sa kalibotanong krisis.  Dihang gipahibawo sa Malakanyang ang pagduaw ni Arroyo sa Estados Unidos karong buwana, gitug-an ni Press Secretary Jesus Dureza nga motambong siya sa Global Leaders' Crisis Summit sa United Nations.

            Maong labihan nakong kurata pagkahibawo nga di diay ang summit ni Bush ang giadto ni Arroyo.

-o0o-

            Nahibalik na si Arroyo sa Pilipinas dihang gipahigayon ang summit ni Bush.  Ang gitambongan ni Arroyo mao ra diay ang interfaith summit sa UN.  Ang nagdapit niya di gani ang UN.  Kon dili ang Saudi Arabia ra.

            Apan wa magtagad ang Malakanyang pagtul-id sa nahauna nilang pahibawo nga motambong si Arroyo sa summit ni Bush.  Maglisod tingali pagpasabot nga way apil si Arroyo.  Maong wa siya makadawat og imbitasyon.

            May sukaranan ang pagduda nga ang kataposang pagduaw ni Arroyo sa US nagtangag og duha ka pamasin:  Una, nga magkakita silang US President-elect Barack Obama sa Chicago (kay unsa may laing hinungdan nga nisimang siya didto nga New York may iyang destinasyon?); ug ikaduha, nga paapilon na lang siya sa summit.

-o0o-

            Di unta angayng mauwaw nga moangkon si Arroyo nga di siya mahitabong apilon pagdapit ni Bush kay ang summit alang lang sa mga sakop sa G20, ang pundok sa adunahan ug malambuong mga nasud:  Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, United Kingdom, US ug European Union.

            Apan di makatugot si Arroyo nga mabantang sa iyang katawhan nga layo ra sa mga higante ug gamhanan.  Nasupalpal na siya sa World Bank ug International Monetary Fund.  Mas pait ang isnab nilang Bush ug Obama.

-o0o-

            Kon wa lang unta maghigwaos si Arroyo pagsikit nilang Bush ug Obama, makamatikod unta siya nga taphaw ang summit ni Bush.  Ang bisan unsang nasabotan di makabugkos ni Obama inig puli na niya sa White House karong Enero 20.  Si Obama wa gani magtagad pagtambong sa summit.

            Si Bush di mahitabong makasulbad sa krisis nga siyay usa sa labing dakog responsibilidad.  Pila na lang ka adlaw ang nahibilin sa iyang pamunoan.  Wa na siyay influencia bisan sa mga senador ug mga kongresista nga sakop sa iyang partido.  Gawas pa, kon tinuod ang pangangkon sa media sa Australia, nangutana pa siyang Australian Prime Minister Kevin Rudd kon unsa ang G20?  [30]  leo_lastimosa@abs-cbn.com

Arangkada of Leo Lastimosa for November 17, 2008

            Nahikap sa Halad

 

            Dayong tapos sa Grand Halad sa Kapamilya sa UP Cebu Grounds, gipahibawo ko sa among mga guwardiya nga 10,200 ka tawo ang ilang naihap nga nakapahimus sa tibuok adlaw nga pangalagad.  Kapin sa lima ka libo ang nakalibre sa konsultasyon ug mga tambal.  Kapin sa unom ka gatos ang naibtan og ngipon.  Mas daghang nalibre sa laboratory services, nakapabakuna, nakapakapon ug nakapapurga sa ilang mga iro ug iring, nakapaayo sa ilang cell phones, personal computers, motorsiklo, TV, radyo ug ubang appliances, nakakuha og mga pasaporte ug driver's license ug mga binhi ug mga lawngon.

            Way usa lang ka institusyon nga makahatag sa maong mga pangalagad ngadto sa maong gidaghanon.  Salamat sa Halad, nagkahugpong ang nagpakabanang kahugpongan pagtanyag sa talagsaong piyesta sa pangalagad sa usa lang ka dapit ug higayon.

-o0o-

            Nakapasalamat ko sa hilom nga wa makawang ang pagbudlay sa gatosan ka mga tigpasiugda ug mga boluntaryo sa Halad, dihang giduol ko og babaye nga may gikugos nga masuso ug nagguroy og laing bata.  Nisenyas nga gigutom siya ug nitudlo sa talisawop nang adlaw.  Wa kong kasabot sa uban niyang senyas maong gipangutana nako ang iyang anak.  Wa sab siyang katubag sa akong pangutana gawas sa pagtug-an nga Michaelangelo ang ngan sa iyang manghod.

            Gihatagan nako siyag kuwarta kay wa na man mi nahibiling pagkaon.  Morang gikumot ang akong kasingkasing dihang giganid niya pagkuha ang tanang biya nga pagkaon sa food packs nga nahibilin sa mga lamesa nga wa mahipos sa mga boluntaryo ug bisan ang mga nalabay na sa mga basurahan.

            Nahagsa kog balik sa yuta.  Bisan sa tanang paningkamot, di lang diay gihapon maatiman ang tanan.

-o0o-

            Apan gusto kong motuo nga nakahimo nang mga tigpasiugda ug mga boluntaryo sa ilang bahin.  Ang hinugpong nilang pagtabang di lang gyod paigo pagpuno sa mas lawom sa katimawa.  Kay lisod ang pagtagbaw sa tanang nagkinahanglan.  Lisod ang pag-ayo sa tanang masakiton.  Lisod ang pagbusog sa tanang gipanggutom.

            Sa kinauyokang bahin sa akong kasingkasing, ako naglaom—wa lang mangindahay kon dili naglaom gyod—nga ang gidaghanon sa mga kinabuhi nga nahikap sa tanang nisalmot sa Grand Halad sa Kapamilya, di lang ang mga natabangan kon dili apil na ang mga nagpakabana pagtabang nila, mas molipang ug mokuyanap pa.  Paghikap ug pagpukaw sa mas daghan pang kasingkasing sa matahom nga kamatuoran nga sa panaghiusa way pagtinabangay nga di mahimo ni kakulian nga di mabuntog.

            Hinaot nga ang ilang panaghiusa manakod, mas molig-on ug mas molambo pa.  Aron pag-atubang sa umaabot pa nga mga pagsuway nga, tungod sa nag-ung-ong nga kalibotanong krisis, mahimong mas lisod ug mas bug-at ug mas sakit ug mas malungtaron pa.  [30]  leo_lastimosa@abs-cbn.com

Arangkada of Leo Lastimosa for November 15, 2008

            SANGANG SA KRISIS

 

            Mga timailhan sa nag-ung-ong nga krisis sa kalibotanong ekonomiya makita bisan asa.  Di lang sa dagkong mga dakbayan nga natay-og sa way kinutoban ug lisod hisabtan nga pagkatangtang sa ilang mga mamumuo.  Kon dili bisan sa UP Cebu Grounds.  Diin gipahigayon ang Grand Halad sa Kapamilya.  Kansang usa sa mga tumong mao ang pagsagang sa pasiunang negatibong mga epekto sa krisis.

Gipaabot nga dugukon sa mga mangapil sa tibuok adlaw nga kalihokan mao ang mga pangalagad nga nahilambigit sa pagpanarbaho sa gawas sa nasud:  Gikan sa paghikay sa nagkadaiya nga mga dokumento sa mga aplikante ngadto sa aktuwal nga pagpangaplay og mga trabaho sa nagkalainlaing kanasuran sa kalibotan.

-o0o-

            Apil sa gitanyag sa Grand Halad sa Kapamilya nga mga pangalagad nga kapahimuslan sa overseas Filipino workers (OFWs) mao kining mosunod:

·        Mobile Passport Service sa DFA;

·        Paghikay sa mga dokumento sa NSO;

·        Paghikay sa clearance sa NBI;

·        Job Search, ang pagtudlo sa mga aplikante sa mga paagi pagpalambo sa ilang kahigayonan nga makatrabaho sa sud ug sa gawas sa nasud, nga dumalahon ni Fidel Magno sa DMDP Cebu City;

·        Pre-Departure Orientation Seminar (PDOS) sa OWWA;

·        IELTS seminar workshop ni Tisha "Inday Tikay" Ylaya; ug

·        Overseas Job Fair sa Panphil Frasco Complex sa Liloan, amihanang Sugbo uban sa 20 ka placement agencies nga may kaliboan ka aprobado nga job orders.

-o0o-

            Ang hulga sa kalibotanong kalisod labihan kalapad nga wa kahibawo ang mga anak sa singot asa sila makadangop ug makapasalipod.  Samtang makadapadasig nga daghan lang gihapon ang kahigayonan sa panarbaho sa nagkalainlaing kanasuran, di makapapas sa ilang kahingawa ang pagkatangtang sa minilyon ka mga trabahante sa Estados Unidos.

            Asa man kutob ang lahutay sa mga industriya nga maoy labing naigo sa krisis?  Kon makatrabaho sila karon, kanus-a man kutob ang ilang seguridad.  Kon natangtang ang OFWs nga nag-una nila, unsa may ilang panagang gikan sa nag-ung-ong nga hingpit nga paghiyos ug paghagsa sa ekonomiya?

-o0o-

            Maong salamat sa tanang nakatabang sa Grand Halad sa Kapamilya, may saad lang gihapon sa paglaom, bisan unsa kaawop. Hangtod nga ang katawhan kamao pa nga magkuptanay, hangtod nga ang mga may katakos sa pagtabang makamao pang molingi sa ilang mga kapamilya nga nag-ilaid sa labihan nga katimawa, di pa hingpit ang kaataon sa kangitngit nga umaabot.

            Ang DYAB Abante Bisaya ug ABS-CBN Cebu, sa makausa pa, mahimo na sang taytayan. Di mapahigayon ang Halad kon dili pa tungod sa pagtinabangay sa nagpakabana nga mga sakop sa Sugbuanong katilingban.  Ang krisis, bisan unsa kamakalilisang, may utlanan.  Ang nagkahiusang katawhan, bisan unsa pay mga pagsuway nga ilang mahiagoman, magpabiling lig-on ug masaligon.  Pagbugtaw ug pagkab-ot sa mas sanag ug makiangayon nga ugma.  [30] leo_lastimosa@abs-cbn.com

Arangkada of Leo Lastimosa for November 14, 2008

            GITUYO PAGLANGAY

 

            Siyarog magpaugat lang gihapon ang mga kompaniya sa lana.  Ubos na kaayong presyo sa lana nga ilang gikompra.  Di na sila angayng magpapating sa panginahanglan paglaslas sab sa presyo sa ilang mga gasolinahan.  Hinaot nga sa kataposan patilawon na gyod nilang mga konsumidor sa makiangayong bahin sa baratong lana.

Nagpadayon pagtibugsok ang presyo sa lana sa merkado sa kalibotan.  Kini tungod sa kahadlok nga ang paghiyos sa ekonomiya sa Estados Unidos ug ubang kanasuran mosangpot sab sa paghagsa sa demanda ug sa aktuwal nga konsumo sa lana.  Sa akong pagsuwat ini, $54 na lang ang matag baril sa lana.  Ang labing ubos nga ang-ang sa niaging 23 ka buwan.

-o0o-

            Dakong bahin sa panagana sa mga kompaniya sa lana pagpaubos sa ilang presyo mao ang kabalaka nga kasamtangan lang ang pagbarato sa lana.  Maong gibangilan na lang nilang daan pinaagi sa pagpaningil sa mas taas nga presyo.  Salamat sa ilang panagana, nisamot pagburot ang ginansiya sa mga kompaniya sa lana.

            Apan bisan ang ilang panagana way sukaranan.  Padayong nitidlom ang presyo sa lana bisan sa lab-as nga pasidaan sa Opec nga laslasan ang ilang produksiyon dayong tapos karong buwana,  Mas sayo kay sa gitakda nilang tigom sa Disyembre.  Ang Opec di na sab ingon ana kahawod.  Di nang makapatuyang pagpaburot sa ilang presyo sa way pagrisgo og dakong kadaot sa ilang mga ekonomiya.

-o0o-

            Unsa pa may gilangayan sa LTFRB?  Dako na man kaayo ang us-os sa presyo sa LPG, nga mao nay gigamit sa kinabag-an sa taxi units sa Sugbo ug ubang bahin sa nasud, nganong gipaigot pa man gyod ang gipaibog nga pagpapas sa P10 nga patong sa P30 nga flag down rate.

            Tinuoray ba gyod ang ilang pagpakabana alang sa kabos nga mga pasahero?  O nagpadaog sa mas dakong tentasyon pagpagamit na sab sa mga politiko?  Nga magpaabot pa og mas tukma nga higayon aron nga makaangkon og mas dakong kredito ang mga nagtungkawo sa Malakanyang?

-o0o-

            Nagpaabot pa ba sila nga makabalik si Pres. Arroyo gikan sa US?  Aron nga maoy mangunay pagpahibawo sa kaayuhan?  Bahala na kon mabuktot una ang mga pasahero og pinaabot kanus-a sila ganahi nga mohatag sa kaayuhan nga hagbay rang nag-ung-ong?

            Unsa man say nakababag sa pagpatuman sa mas dako ug mas makiangayong us-os sa plitehan sa jeepneys ug buses?  Tinuod bang tinuyo ang kalangay?  Aron makapangangkon si Arroyo nga iya ning pinaskohan ngadto sa mga pasahero pagmatuod nga tinuorayng nagdugo ang iyang kasingkasing sa ilang kalisod?

-o0o-

            Kasayurang Kinuykoyan:  Kay wa man gyod sila magka-istorya, gi-text na lang ni Arroyo si Obama:  "Barack, in behalf of the Filipino people, congratulations for winning the election."

            Nitubag si Barack:  "Hu u?"  [30]  leo_lastimosa@abs-cbn.com

Arangkada of Leo Lastimosa for November 13, 2008

            GRAND HALAD

 

            Sa makausa pa, ilusad na sab sa DYAB Abante Bisaya ug ABS-CBN Cebu ang Grand Halad sa Kapamilya karong Sabado, Nobyembre 15, 2008.  Ang higanteng piyesta sa mga pangalagad ipahigayon tibuok adlaw sa UP Cebu Grounds sa Lahug, Dakbayan sa Sugbo.

            Mag-abot ang labing matinabangon ug ang labing tabanganan nga mga Sugbuanon.  Magsilbi lang ming taytayan sa makapatandog nga pag-inunongay, makapatukbil nga pagsinabtanay ug makapadasig nga pagkinuptanay.  Hinaot nga mosangpot sa mas lig-on nga panaghiusa pagsagubang sa mas lisod pang mga pagsuway.

-o0o-

            Ang sentro sa Halad mao ang libreng pangalagad sa mga doktor ug libreng mga tambal sa mga pasyente.  Magtambayayong ang mga mananambal sa CCMC, Cebu City Health Department (CCHD) ug PAF; mga tinun-an sa nursing sa UV ug UC; ug pharmacists sa Cebu Pharmaceutical Association.

            Motabang nilang mga dentista sa Cebu Dental Society uban ang ilang dental van; mga dentista sa CCHD nga magda sab og van; ug mga dentista sa PAF.  Niitampo sa mga tambal ang Bantay Bata 163, Department of Health DOH 7 ug Epson Software Engineering.

-o0o-

            Ang kaliboan nga maghugop sa Halad makapahimus sa mosunod nga mga pangalagad:

·        CBC alang sa 500 ka pasyente gikan sa Chong Hua Hospital;

·        Glucose test, urinalysis ug blood typing sa Perpetual Succour Hospital;

·        Blood pressure check-up, weight ug body mass index check ug blood sugar test pinaagi sa Philippine Paramedical & Technical School;

·        Urinalysis ug x-ray alang sa 100 ka pasyente gikan sa Hi-Precision Diagnostic;

·        Iridology ug product sampling sa CMD;

·        Kaliboan ka sets sa toothbrush, toothpaste, tumblers ug duwaan nga mga relo gikan sa Timex ug Epson;

·        Libreng bakuna, kapon, purga, bitamina, shampoo ug tambal sa kagid sa mga iro ug iring uban sa Cebu City Veterinarian's Office;

·        Libreng masahe sa Bright Pathway Blind Association ug reflexologists nga gipangulohan ni Boy Cañedo;

-o0o-

·        Libreng serbisyong legal ug notaryo uban sa mga sakop sa YLAC ug IBP Cebu Chapter;

·        Mobile passport service sa Department of Foreign Affairs;

·        Paghikay sa mga lisensiya sa mga drayber sa Land Transportation Office;

·        Libreng seminar alang sa housing loan applicants pinaagi sa PAG-IBIG;

·        One-stop-shop sa mga pangalagad sa NSO, SSS, GSIS ug Philhealth;

·        Libreng mga binhi ug semilya gikan sa Department of Agriculture;

·        Libreng pag-ayo sa cell phones, PC, motorsiklo, TV ug radyo pinaagi sa Tesda, IECEP ug Hi-Tech men sa DYAB;

·        Overseas Job Fair sa Liloan KAI Complex;

·        Job Search uban ni Fidel Magno sa DMDP Cebu City;

·        Pagpamalit sa mga basura pinaagi sa SM Trash for Cash project; ug

  *   Mass feeding, counselling ug Bantay Baterya sa Bantay Bata 163.  [30]  leo_lastimosa@abs-cbn.com

Arangkada of Leo Lastimosa for November 12, 2008

            ISNAB NI BARACK

 

            Masihag sa nagkasunging sulti sa mga opisyal sa Malakanyang ang desperadong tinguha ni Pres. Arroyo pagsikit ni US President-elect Barack Obama:

·        Kaduha na siya manawag ug kaduha na balibari ni Obama;

·        Nangangkon si Arroyo nga bisan wa sila magkasulti nagkasabot na silang Obama pagpalambo sa relasyon sa RP ug US;

·        Sa pagbalik ni Arroyo sa US karong buwana, gipahibawo ni Executive Secretary Eduardo Ermita nga mosuway si Arroyo pakigkita ni Obama;

·        Tungod sa mas dakong kauwawan kon isnabon na sab ni Obama, si Press Secretary Jesus Dureza nibawi nga way plano si Arroyo pakigtagbo ni Obama.

-o0o-

            Si Arroyo wa gyod motagam.  Di ni unang higayon nga giisnab siyang Obama.  Una siyang nabalibaran dihang nisuway pagpakigkita ni Obama niadtong Hunyo.  Kanus-a wa pa gani madeklarar si Obama nga kandidato pagka presidente sa Democratic Party.  Sa ato pa, ang pagdumili ni Obama pagtubag sa duha ka tawag sa telepono ni Arroyo sa niaging semana mao nay ikaduha ug ikatulong isnab.

            Di sulagma nga gipili ni Arroyo ang pagtugpa sa Chicago.  Nga maoy gibasehan karong Obama pagtukod sa iyang administrasyon.  Mas dako ang kahigayonan nga magkasugat ang ilang dan didto.  Apan haskang demalasang Arroyo.  Pagtugpa niya sa Chicago, nilupad si Obama paingon sa Washington aron paghapsay uban ni US President George Bush sa Oval Office sa iyang pagpuli sa White House karong Enero 20.

-o0o-

            Nakabantay na gyod tingali si Arroyo unsa ray tan-aw ni Obama niya.  Makapataas unta sa iyang agtang kon gibalibaran pang Obama ang tanang nanawag niya aron itingob ang panahon sa pagpili sa mga sakop sa iyang bag-ong gabinete.  Apan sa mga adlaw nga nagdumili siya pakigsulti ni Arroyo, nakighinabi si Obama sa laing siyam ka mga pangu sa mga nasud sa Australia, Britanya, Canada, Pransiya, Alemanya, Israel, Japan, Mexico ug South Korea.

            Apan nganong nagpabaga man si Arroyo pag-insistir pakigsulti ni Obama?  Gusto ba lang masabligan sa katam-is ug makasaysayanong kadaogan sa labing unang itom nga presidente sa US?  O kabahin na ni pagpangandam sa hanap-pa-sa-diyes-panas niyang kaugmaon human sa Malakanyang?

-o0o-

            Nganong ganahan man kaayo si Arroyo nga makigsuod sa mga pangu sa US?  O magpatuo nga suod nila?  Si Bill Clinton gi-uran-uran niya pagwara-wara isip classmate sa Georgetown University sa Washington.  Si Bush gipalapalahan pag-ayo sa iyang gubat batok sa terorismo.  Karon si Obama na say iyang giinitan.

            Si Obama supak sa gubat nga gisupsopan pag-ayong Arroyo.  Mao ba ni hinungdan nga wa maghinam-hinam si Obama pakigtagbo niya?  Kon molampos sa iyang pamingwit, si Arroyo ang mahimong labing unang langyaw nga pangu nga makatagbo ni Obama human sa iyang kadaogan.  Ug makapangangkon nga nakasandig siya sa labing gamhanan ug busa way makatay-og niya.

            Kon mapakyas...  [30]  leo_lastimosa@abs-cbn.com