Arangkada of Leo Lastimosa for February 17, 2008

       PULING SA PALASYO

 

       Dili ang dakong bato, kon dili ang pino nga bas, maoy makapuling.  Mao ni nakat-onan sa Malakanyang sa pagkatay-og karon sa tibuok nasud tungod sa expose ni Rodolfo Noel Lozada Jr.  Sa ilang paningkamot pagpalayo gikan sa Senado ni Ched Chairman Romulo Neri—gikan sa pagtago niya dihang naluwatan nang arrest warrant hangtod sa pagdangop sa Korte Suprema aron di siya mapugos paghatag og testimoniya sa tinuorayng papel nilang Pres. Arroyo ug sa iyang bana sa NBN-ZTE scandal—nataligam-an nila si Lozada.

        Tungod sa pagtuo nga si Neri ray mamahimong tinubdan sa mga senador sa kasayuran nga makaduhig sa magtiayong Arroyo sa makauuwaw nga eskandalo, ang kadagkoan sa palasyo wa na magtagad sa mga pasidaan nga daghan sag og nahibaw-an sa transaksiyon si Lozada.  Maong ang ilang pag-atiman niya labihan kataphaw.  Ug uwahi na.

-o0o-

        Samtang ang labing dagkong opisyal sa Malakanyang maoy naghikay sa tanang panginahanglan ni Neri paglikay sa Senado ug pagdaog sa labawng hukaman, mga piso ray gitahasan pagtago ni Lozada.  Ang determinasyon ni Lozada pagdumili pag-atubang sa mga senador gibugtian sa palasyo og salingkapaw nga ulug-ulog.

        Gipalarga nila si Lozada sa Hong Kong apan wa hikaya ang iyang visa aron makalahos na lang gyod sa London.  Wa gani magtagad pagpakuyog sa iyang pamilya aron nga di magmingaw sa labihang katugnaw sa Hong Kong.  Nasobrahan rang pagsalig sa palasyo nga kon di dayon madakpan sa mga senador silang Neri ug Lozada motahan sa pagpangita nila ug magpalipat na lang sa mas bag-o ug mas init nga mga kontrobersiya.

        Ang mga paningkamot sa Malakanyang pagpahilom ni Lozada dihang nahibalik na sa nasud wa sab magkadimao.  Kon tinuod mang may laraw pagpatay ni Lozada, naapiki sila tungod sa presensiya sa mga sakop sa media, kaparyentihan ni Lozada ug mga representante sa Senado sa NAIA nga nayagaw dayon dihang wa nila igkita si Lozada.

-o0o-

        Gikatahong gitulisok sa Malakanyang si kanhi presidential chief of staff Mike Defensor nga napakyas pagkumbinser ni Lozada pagpakahilom.  Gipanghimakak hinuon ni Defensor ang pasangil nga P5 milyones ang gitagana alang ni Lozada apan P50,000 ray iyang gihatag.

        Ang labing dakong sayop sa Malakanyang mao ang pagtuo nga si Lozada sama katalawan ni Neri.  Wa nila masusi nga dihang napatay ang igsuon ni Lozada, nidangop sab siya sa Senado bisan sa daghang mga hulga sa kamatayon batok niya ug sa iyang pamilya.

-o0o-

        Sa sunod niyang atubang sa Senado, si Lozada gipaabot nga mopaulbo og duha ka dagkong bomba:

·        Si Donald Dee, presidente sa PCCI, nipapili niya sa suburno nga mas dako pa sa P200 milyones o pagka finance secretary kon palutson ang NBN-ZTE; ug

·        Gihatagan siyag P500,000 pang-shopping sa Hong Kong apan ang tanan niyang pinalit naa rong Rodolfo Valeroso.  [30]  leo_lastimosa@abs-cbn.com

Arangkada of Leo Lastimosa for February 16, 2008

          ARGUMENTO NI GLO

 

          Atubangan sa sibaw nga mga pasangil sa pagpamakak, pagpanikas ug pagpangawkaw batok sa iyang pamunoan, si Pres. Arroyo niluwat sa iyang giisip nga labing lig-ong argumento nganong angay siyang magpabilin sa gahom hangtod sa 2010.  Ambot nakatabang ba sa paglibkas sa iyang pagtak-om mahitungod sa nagbuntaog nga mga protesta batok niya ang kasayuran nga ang iyang pamahayag mabasahan sa tibuok kalibotan.

Dihang gikuhaan sa Reuters News Agency sa iyang reaksiyon sa nabanhaw nga mga awhag alang sa iyang resignasyon, si Arroyo nitubag nga magpabilin siya sa gahom di tungod sa kakuwang sa paningkamot sa iyang mga kaatbang kon dili tungod kay tugotan siya sa katawhan.  Ug tugotan siya sa katawhan tungod sa duha ka dagkong butang nga iyang nahimo:

·        Una, ang pagkab-ot sa politikanhong kalinaw; ug

·        Ikaduha, ang paglambo sa nasudnong ekonomiya.

-o0o-

          Diin kahang tumoya sa iyang buhok nahulbot ni Pres. Arroyo ang sukaranan sa pangangkon nga nagmalampuson siya pagpatigbabaw sa kamalinawon sa politika sa nasud.  Ang kayagaw sa politika atol sa iyang pamunoan karibalan lang sa mga tuig nga naghingutas nang diktadura ni Ferdinand Marcos, kanus-a natay-og ang tibuok nasud sa lapad nga mga protesta nga nanlimbasog paglingkawas.

          Labawng kuwestiyonable ang iyang pagpamugos nga siyay nakapalambo sa ekonomiya.  Mas katuohan kay sa iyang pag-ilog sa kredito ang di malalis nga pagburot sa dollar remittances sa OFWs nga, gawas nga nidaghan, nagdawat na karon og mas dagkong suholan.  Ang pait nga kamatuoran mao nga bisan kinsa pay naglingkod nga presidente molambo gyong ekonomiya kon ang dollar remittances moabot nag $16 bilyones matag tuig.

Salamat sa kapakyas ni Arroyo pagmugna og igong kahigayonan sa panrabaho dinhi sa ato, napugos ang OFWs pagbiya sa ilang mga pamilya aron manimpad sa langyawng kabaybayonan.

-o0o-

          Ang mga gipanulti ni Pres. Arroyo mas sakit alang sa kinabag-an.  Gawas nga gipahaom lang sa iyang kahakog sa gahom, nagpintal pa gyod sa labing dakong bakak.  Kay pabilin silang naglaway sa bisan unsang bunga sa ekonomikanhong paglambo.

          Unsay kapuslanan sa paglambo sa ekonomiya sa papel ug sa stock market?  Kon padayong nagkadaghan ang mga talad nga way pagkaon?

-o0o-

          Ang kabangis ug ka-desperado sa mga maniobra sa administrasyon paglubag sa mga pamahayag ni Lozada, pagbuong sa iyang kadungganan ug paghudlat niya ug sa iyang pamilya, nagpakita lang unsa kakusganon ang tay-og nga namugna sa iyang testimoniya ngadto sa naapiking pamunoan.

          Ang kadaghan sa mga tawong nagtapok sa Makati ug ubang bahin sa nasud, bisan sa padayong kahanap sa baruganan sa Simbahang Katoliko, di makatabang sa nabangkarota nang kawsa sa administrasyong Arroyo.  Inihap na lang ang malipayon nilang mga adlaw.  Ang kangitngit di mahitabong mopatigbabaw batok sa kahayag.  Ang kadaotan sa pipila di magsilbi atubangan sa kaayuhan sa kinabag-an.  [30]  leo_lastimosa@abs-cbn.com

Arangkada of Leo Lastimosa for February 15, 2008

          SIWIL NANG SAYAL

 

          Nabisto na gyong kamot sa Malakanyang sa pagdagit ni Rodolfo Noel Lozada Jr.  Sa kalapad sa maniobra nga gipasiugdahan—gikan sa pagpalihok sa nagkalainlaing ahensiya sa kagamhanan ngadto sa pagsugo sa ilang kadagkoan sa pagpamakak—nataligam-an sa palasyo pagtapak ang gagmayng mga buslot nga nakapasiwil sa sayal sa administrasyon.  Ug naghulgang makapahunlak sa higanteng tigbayon sa pamakak nga gisalimbong sa nangalisbo nilang binuhatan.

          Ang logbook sa NAIA, ang tanlag ni Lozada ug ang pagpakabana sa relihiyusong mga pundok.  Pipila lang sila sa mga gingi, nga tungod tingali sa ilang kagamitoy wa mabantayi sa kagamhanan.  Maong gawas nga napakyas sila pagpalayo ni Lozada gikan sa Senado ug sa paglubag ug pagbuong sa iyang testimoniya, nameligro pa gyong hingpit nga mahukasan ang tanang nangagi nilang kahiwian.

-o0o-

          Karong natino na sa mga senador nga may mga sakop sa Presidential Security Group (PSG) nga niapil pagkuha ni Lozada sa tugpahanan, nisamot kasikit ang eskandalo ngadto sa Malakanyang.  Ang bisan unsang nahibiling pagduda sa kalambigitan sa mga sakop sa gabinete sa pagpatago ug pagdagit ni Lozada napapas sa presensiya sa armadong mga guwardiya ni Pres. Arroyo sa NAIA atol sa pagkawas ni Lozada sa Cathay Pacific flight gikan sa Hong Kong.

          Mao diayng nagpagoryo-goryo ang pipila ka mga opisyal sa administrasyon nga gipaatubang sa mga senador niadtong Lunes.  Tinuod gyod diay nga ang kinadak-an nilang tahas mao ang pagpamakak, paglipat-lipat pagtubag sa mga pangutana ug pag-inamaw na lang kon maapiki na sila.

Kay kon itug-an ang kamatuoran, magkabulingit diay ang ilang mga amo.  Di lang sa makalilisang nga pagpanikas ug pagpangawat kon dili sa mas dako pang krimen.  

-o0o-

          Nga maoy linya ni Senate President Manny Villar.  Sa tantong lihay-lihay ni Presidente Arroyo sa Hello Garci ug NBN-ZTE scandals, mahimong masabit hinuon siya sa pagdagit ni Lozada.

          Si Arroyo gipasidunggan nga maayong tinun-an sa kasaysayan maong nilampos pagbaraw sa tanang pagsuway pagpalagpot niya sa gahom.  Mahimong nataligam-an hinuon niya ang usa sa labing mahinungdanong leksiyon sa politikanhong kasaysayan:  Ang cover-up mas grabe pa kay sa orihinal nga krimen.

-o0o-

          Ang bisan unsang nahibiling pagduda sa kamatinud-anon sa testimoniya ni Lozada napapas sa desperadong mga lakang sa Malakanyang pagguba sa iyang kadungganan, pagpanghimakak sa iyang mga pasangil ug paghudlat pagpasaka og bisan unsa na lang kaso batok niya ug sa iyang pamilya.

          Silang Vidal Doble ug Sandra Cam mahimong kapasanginlan nga mga bata ni Senador Panfilo Lacson ug gidiktahan sa ilang mga pasangil sa Hello Garci ug jueteng.  Si Joey de Venecia III mahimong matulisok nga nangluod lang kay nasapawan sa ZTE ug kanhi Comelec chairman Benjamin Abalos ang iyang transaksiyon.

Apan unsa may ilang ikapasangil ni Lozada?  Nga igo lang nituman sa iyang pasidaan nga di mamakak kon mapakyas sila pagpalayo niya gikan sa Senado?  [30]  leo_lastimosa@abs-cbn.com

Arangkada of Leo Lastimosa for February 13, 2008

            TINUOD NGA ISTORYA

 

            Hapit ko matagak sa akong lingkoranan og kinatawa pagkabasa sa sinuwat ni Manuel Buencamino sa iyang web log (http://www.uniffors.com/) mahitungod sa kasinatian ni Rodolfo Noel Lozada Jr.  Nga niawhag sa mga maigo sa iyang testimoniya sa Senado pagpanalipod niya gikan sa mga tawo nga nagtinguha sa iyang kaayuhan ug seguridad.

            Tuguting akong pakisaw-an ninyo kining gitawag niyang tinuod nga bersiyon sa talagsaong biyahe ni Lozada:

            Among gikuha si Lozada human nanaog sa iyang Cathay Pacific flight gikan sa Hong Kong.

            "Kinsa man mo?," nangutana siya.

            "Kami ang police protection nga imong gipangayo," nitubag mi.

            "Apan wa ko mangayo."

            "Imong igsuon maoy nangayo."

            "Mao ba?  Ug panalipdan ko ninyo gikan ni kinsa?"

            "Sa mga tawong nagpaabot nimo sa arrival area."

            "Pero ako na silang pamilya ug mga higala.  Kuyog ba nilang akong igsuon?"

            "Kinahanglang mobiya dayon ta sa airport."

            "Asa man ko ninyo dad-on?"

            "Wa pa mi kahibawo pero maglikay-likay ta.  Molibot ta sa Villamor, C-5, SLEX, Cavite ug Laguna."

            Nagbiyahe mi sud sa pila ka oras, nagbantay sa mga madre, La Salle brothers ug ni Leah Navarro.  Nabatian ni Lozada ang among komunikasyon sa command center.  Nakabati siya sa sugo nga mamalik na mi kay saba na kaayong media sa iyang "pagkahanaw."  Nailad ang media nga among gidagit si Lozada.

            Si Lozada gawasnong nakigsulti sa iyang pamilya.  Nakigduwa pa gani siya og cell-phone-hide-and-seek sa iyang asawa.

            "Asa man ka?," ni-text iyang asawa.

            "I-triangulate akong signal, kon kamao ka, LOL," iyang gisungog iyang asawa.

            Si Lozada nakigsulti sab nilang Lito Atienza ug Romulo Neri.  Nipasalig si Atienza nga silang Ma'am ug ES ang nagduma sa operasyon.  Haskang lipaya ni Lozada.

            "Naghinam-hinam na kong mopauli pagpahibawo sa akong asawa nga si Ma'am ug ES ang nangunay pagpanalipod nako!,? nituaw siya.

            Gigutom na mi maong nangita mig kan-anan.  Didto mi sa Outback sa Libis.  Natsambahan namo didtong abogado nga naatlan sab nga may mga dokumento nga pirmahanan ni Lozada.

            Apan nirekamo si Lozada, "Sayop man ni, hastang petsa."

            "Typos ran a," pasalig sa abogado, pirmahi lang na para sa comfort sa palasyo.

            Gida dayon namo si Lozada sa La Salle.  Pero gibanhigan mi sa mga madre.  Napugos mi pagsurender ni Lozada nila.  Way dag-anan among mga armas sa ilang gahom.

            Pagka alas-2:30 sa kadlawon, si Lozada, gibarikadahan sa mga madre, nag-press conference diin iyang gilubag ang tanang nahitabo niya ubos sa among proteksiyon.  Nagdugo ang among mga kasingkasing paghilak niya.  Nahibawo ming hadlok kaayo siya sa mga madre.

            Human sa press conference, gitugyan siya sa mga madre ngadto sa Senado.

            Binilanggo na siya karon sa Senado, napugos pagpamakak batok sa inosenteng mga tawo kansang bugtong tinguha mao ang pag-alagad sa nasud kutob sa ilang mahimo.

            Motuo mog sa dili.  [30]  leo_lastimosa@abs-cbn.com

Arangkada of Leo Lastimosa for February 13, 2008

            PAPEL NI LOZADA

 

            Sakto si Rodolfo Noel Lozada Jr.  Sa iyang pagbalibad pag-apil sa protesta nga ilusad sa politikanhong oposisyon ug militanteng mga pundok batok sa pamunoang Arroyo.  Ug sa iyang pagdumili pagdason sa nisibaw nga awhag alang sa resignasyon ni Pres. Arroyo.  Kay kon mokuyog tuod siya sa maong mga kalihokan, maduhigan og politika ang iyang gibistong kahiwian sa National Broadband Network (NBN).

            Apan sayop sab siya.  Ang iyang pagdumili pagpanginlabot sa mga protesta pinasikad sa iyang expose makahimong way kapuslanan sa iyang pagrisgo sa iyang kinabuhi ug sa iyang pamilya.  Kay makatabang hinuon siya pagtinuod sa iyang nahaunang kahadlok.  Nga mangiyugpos lang ang nagkalainlaing mga hut-ong sa katilingban ug ang kinabag-an sa katawhan bisan sa nabistong higanteng kahiwian.

            Di gyod tuod kasinahan ang nahimutangan karon ni Lozada.

-o0o-

            Angay hinuong hangpon ni Lozada ang lapad nga suporta nga iyang naangkon gikan sa Catholic Bishops Conference of the Philippines (CBCP) ug ubang nagpakabanang mga pundok.  Gawas nga nituo sila sa iyang gibisto nga mga kasayuran, giawhag nila ang katawhan sa pagpamalandong ug sa "katilingbanong paglihok."

            Bisan di kabahin sa iyang mga plano, si Lozada nahimo na karong simbolo sa pakigbisog sa tanang nagtinguha og makiangayong kausaban alang sa nasud ug sa katawhan.  Sa gusto niya ug sa dili, si Lozada mahimo nang kabahin sa lapad nga kalihokan pagbugkos sa nagkabuakbuak nga mga hut-ong, nga nadasig sa iyang maisugong pagbarug alang sa kaligdong ug kamatuoran.

            Usa sa mga hinungdan nganong napakyas ang nangaging mga pagsuway pagpalagpot ni Pres. Arroyo mao ang pagduda sa katawhan sa katarung sa alternatibong liderato.  Ang talagsaong kamatinud-anon ni Lozada maoy lab-as nga sablig sa kahigayonan alang sa katawhan nga napaso na sa nangaging mga saad sa kausaban.

-o0o-

            Labing uwahing nibilib ni Lozada mao si Senador Joker Arroyo.  Natandog ba kaha sa mga pagsaway nga nahiagoman sa iyang paghasi ni Lozada, si Arroyo nitandi nang Lozada ngadto ni Clarissa Ocampo, ang giilang yawe sa pagkalagpot ni kanhi presidente Joseph Estrada.

            Nitataw hinuon si Arroyo nga mosamot unta kalig-on ang testimoniya ni Lozada kon may mapresentar siyang mga ebidensiya.  Apan nahibawo si Arroyo nga samtang way resibohay ang tinago nga mga transaksiyon, way makapugong sa Senado pagtabang pagtigom sa mga dokumento nga modason sa mga pasangil ni Lozada.

-o0o-

            Laing posibleng hinungdan sa pagkausab sa pagtan-aw ni Arroyo kang Lozada mao ang nabistong kamatuoran nga nagkatagbo gyod ang iyang asawang si human rights lawyer Felicitas Aquino ug si Lozada sa ilang bay sa Dasmariñas Village sa Makati sa niaging tuig.

Di na kapasanginlan si Lozada nga nagpagamit ni Senador Panfilo Lacson.  Kapasanginlan gani hinuon si Arroyo nga wa magpakabana sa seryusong kasayuran sa kahiwian nga mahimong gisumbong sa iyang asawa ngadto niya.  [30]  leo_lastimosa@abs-cbn.com

Arangkada of Leo Lastimosa for February 12, 2008

            GILAWOG SA TIRONG

 

            Pipila sa mga opisyal sa pamunoang Arroyo nga niatubang sa mga senador aron pagpanghimakak sa mga pasangil ni Rodolfo Noel Lozada Jr. morang mga ulipon nga gilawog sa tirong.  Nahibawo nga kinahanglan silang mamakak.  Labihang lisora sa ilang gimbuhaton.  Kay, sama sa kasinatian sa ubang mga bakakon, lisod kaayong pagtanos sa ilang dagway ug bayhon kon mangulipas kay kinahanglang hinumdoman ang nahaunang mga bakak aron mohaom sa mosunod pang mga pamakak.

            Apan lahi sa mga ulipon nga way mahimo pagpanalipod sa ilang kaugalingon, ang namakak nga mga opisyal naghupot og dakong gahom.  Busa di sila ray maduhig sa ilang pamakak.  Hasta ang mga institusyon nga ilang gipangulohan giapil na nila paggamit aron pagbukubuko sa katawhan nga mao untay ilang alagaran.

-o0o-

            Labing nagkabulingit sa imbestigasyon sa Senado mao ang mga opisyal sa kapolisan ug sa NAIA:

·        Gihatagan nila og "seguridad" si Lozada bisan way klarong kasayuran may hulga ba gyod batok sa iyang kinabuhi;

·        Wa nila pasudla sa NAIA ang sergeant-at-arms sa Senado nga nagda sa warrant of arrest batok ni Lozada ug wa nila paagia si Lozada sa naandang agianan, gilaktawan pa gani ang Buro sa Imigrasyon ug wa pa mauli ang iyang pasaporte hangtod karon;

·        Gitugyan sa PSPO sa PNP si Lozada ngadto ni SPO4 Rodolfo Valeroso (alyas Roger ug alyas Rolando) nga wa nila mailhi;

·        Nikumpisal si Senior Superintendent Paul Mascariñas nga ang labing dakong hulga nga ilang gipalikayan ni Lozada mao ang mga sakop sa media nga nagtapok sa NAIA ug sa iyang bay sa Pasig; ug

·        Pulos sila nagpa-goryo-goryo mahitungod sa arrest warrant batok ni Lozada ug sa kadinalian sa panginahanglan pagsurender sa saksi ngadto sa mga senador.

-o0o-

            Gawas nilang Senador Miriam Defensor Santiago, nga nisuway pagguba sa kaligdong ni Lozada, ug Senador Juan Ponce Enrile, nga morang bata nga nagreklamo  sa kadugay sa iyang turno sa pagpangutana, nitumaw nga laing kontrabida sa Senado si Joker Arroyo.  Ang giilang kampeyon sa tawhanong katungod atol sa ngitngit nga katuigan sa diktadurang Marcos, si Arroyo gikahadlokan nga hingpit nang nasaag sa iyang gigakos nga kawsa.

            Sa iyang pagkuwestiyon sa pakigsulti ni Lozada kang Senador Panfilo Lacson niadtong Disyembre, nabisto na hinuon nga niadto si Lozada sa iyang pinuy-anan aron unta mosumbong sa kahiwian sa NBN-ZTE.  Nasingitan hinuon siyang Lacson nga mas interesado lang siya sa kamatuoran kay ni Arroyo.

-o0o-

            Sa ikaduhang adlaw sa iyang pag-atubang sa Senado, wa matay-og ang kakatuohan ni Lozada.  Gawas sa pagkabisto nga may pribado sab siyang bodyguards nga niadto sa dormitory sa La Salle, way laing makadaot nga kasayuran nga napresentar batok niya.

            Si Lozada nagpakita nag kasuko.  May sukaranan ang paghinam-hinam sa sunod nga mga kasayuran nga iyang ibutyag sa mosunod nga mga adlaw.  [30]  leo_lastimosa@abs-cbn.com

Arangkada of Leo Lastimosa for February 11, 2008

       BISTONG MGA BAKAK

 

       Sa pagdinalidali sa Malakanyang pagpanghimakak sa mga pasangil ni Rodolfo Noel Lozada Jr., pinaagi sa way kinutobang press conferences ug press releases, nagkatuiris na hinuong ilang gipabaha nga mga kasayuran nga nakapalig-on, inay makapahuyang, sa kakatuohan sa labing uwahing saksi sa imbestigasyon sa Senado sa NBN-ZTE scandal:

·        Nangugat ang DOTC nga way bisan gamayng labot sa transaksiyon si Lozada, apan si Ched Chairman Romulo Neri niangkon nga iyang gipatabang si Lozada pagsubli sa proyekto;

·        Niinsistir sang DOTC nga way labot sa NBN-ZTE deal si kanhi Comelec chairman Benjamin Abalaos, apan si Abalos niangkon nga gipaila niyang kadagkoan sa ZTE, nga iyang suod nga mga higala, ngadto sa mga sakop sa gabinete;

-o0o-

·        Si PNP Chief Avelino Razon nangugat nga way polis nga SPO4 Roger Valeroso nga gitumbok nga maoy nagkuha ni Lozada gikan sa NAIA, apan nabisto nga dunay SPO4 Valeroso nga naa na ron madestino sa buhatan ni DENR Secretary Lito Atienza;

·        Si DENR Secretary Atienza kusganong nihimakak nga iyang gipakalma si Lozada nga iyang mga ahente ang nagkuha sa nauwahi gikan sa NAIA, apan ang kalambigitan ni Valeroso sa iyang buhatan nakapalig-on sa pamahayag ni Lozada;

·        Si Senior Superintendent Paul Mascariñas, PSPO deputy director, nangangkon nga siyay nakiglambigit sa kadagkoan sa NAIA sa ilang pagkuha ni Lozada, apan si Heneral Angel Atutubo, kanhi military aide ni Pres. Arroyo, niingon nga si Valeroso ray nakiglambigit niya;

-o0o-

·        Nipasalig silang Razon ug Mascariñas nga wa nila higpiti ang kalihokan ni Lozada samtang ubos sa ilang kustodiya, apan si Mascariñas niangkon sa iyang affidavit nga ilang gibalibaran si Lozada dihang nagpahatod unta sa ilang bay sa Pasig;

·        Ang unang patuo sa Malakanyang nga wa nila patagoa si Lozada gikan sa Senado kay may tambongan siyang tigom sa London gisukwahi sa ilang pag-angkon nga nakigsulti ni Lozada si Deputy Executive Secretary for Legal Affairs Manuel Gaite, nga gitambagan siyang Atienza sa pagtago ug nga si Lozada didto ra maglublob sa Hong Kong sud sa usa ka semana kay wa man gyod diay tigom sa London;

-o0o-

·        Sa sinugdanan, si Neri namalibad nga wa silay kontak ni Lozada human sa pagbiya ni Lozada paingon sa Hong Kong hangtod nga niatubang na sa Senado, apan karong bag-o niangkon na si Neri nga nagkasulti diay sila ug nga siya pa gani nag-text ni Lozada og mensahe alang sa suwat ngadto ni Senador Juan Ponce Enrile; ug

·        Dihang wa dayon igkita sa iyang pamilya si Lozada, labihang kisikisi sa Malakanyang nga wa silay kasayuran hain siya nahimutang, apan si kanhi Housing czar Mike Defensor niangkon nga niduaw siya sa nahimutangan ni Lozada sa dormitoryo sa La Salle ug gitambagan pa gani nga magpatawag og press conference.  [30]  leo_lastimosa@abs-cbn.com

Arangkada of Leo Lastimosa for February 10, 2008

       SAGANG SA LAPOK

 

       Di lagi mahimong tabonan ang kamatuoran.  Mahimong maluok sud sa pipila ka adlaw.  O tuig.  Apan di hangtod sa kahangturan.  Mahimong malilong gikan sa pipila.  Apan di sa tanan.

        Kining di mapiog nga katakos sa kamatuoran sa pagtuyhakaw maoy labing gamhanang kaaway sa pamunoang Arroyo.  Sa kadaghan na sa ilang mga bakak, nakalimtan na gani tingali nila ang uban, bisan sa paggamit sa tibuok makinarya sa pamunoan sa paglibog, pagsaag ug pagpangulipas, moabot ra gihapong adlaw nga maapsan sila sa kamatuoran.

        Giluba nilang pakisusi sa Hello Garcia.  Apan nakalighot si Vidal Doble.  Gigakotan nilang baba ni Romulo Neri sa NBN-ZTE deal.  Napalagpot na gani nila si Jose de Venecia.  Apan wa nila matago ni mapatak-om si Rodolfo Noel Lozada Jr.

-o0o-

        Samtang daghang nipasidungog, duna say nisaway sa pangangkon ni Lozada nga daghan na siyang gisubli nga mga proyekto sa kagamhanan nga iyang gipalusot ang mga komisyon kay di sama kadako sa P6.5 bilyones nga giingong gipamugos ni kanhi Comelec chairman Benjamin Abalos gikan sa NBN-ZTE.  Alang sa mga nakadayeg, wa magpatuo nga santo si Lozada.  Ang iya ganing kasinatian sa pangurakot maoy nakahimo niyang mas katuohan pagbisto sa kahiwian sa NBN-ZTE.

        Apan ang mga wa mobilib nitataw nga garbo maoy nagtukmod ni Lozada pag-insistir nga mahimo niyang inat-inaton ang presyo sa iyang giduma nga mga transaksiyon aron makabolsa ang mga kawatan ug sa samang higayon may kaayuhan sang makuha ang katawhan.

        Sakto o sayop man si Lozada, gipalili ta niya unsa ra gyod diay kasayon lubagon ang mga lagda sa kagamhanan pahiuyon sa mga kapritso sa labing dagkong mga opisyal kansang kahakog wa nay kinutoban.

-o0o-

        Samtang nagsuwat ko ini, natarantar pagpangukadyang ang Malakanyang sa mga dokumento sa tanang transaksiyon ni Lozada isip presidente sa Philippine Forest Corporation.  Uban ang panghinaot nga mapun-an pang kasayuran nga ila nang nalawog ngadto ni Senador Miriam Defensor Santiago pagbuong sa kadungganan ni Lozada.

        May gamay hinuong suliran ang palasyo.  Giangkon ni Lozada ang mga anomaliya nga gipasangil batok niya.  Ug nisamot kalig-on ang iyang pangangkon nga di siya gustong hingpit nang mapilde ang iyang kalag pinaagi sa pagpakahilom na lang sa NBN-ZTE.

-o0o-

        Samtang nagpadayon ang testimoniya ni Lozada sa Senado niadtong Biyernes, suking tigpaminaw sa DYAB Abante Bisaya nipada nako og lista sa laing pito ka kontrobersiya nga gipasangil batok ni First Gentleman Mike Arroyo:

·        P321 milyones nga Jose Pidal bank account;

·        German bank account;

·        P728 milyones nga Fertilizer scam;

·        Jueteng payola;

·        Importasyon sa P9.5 milyones nga nangalata nang bugas humay gikan sa India;

·        P50 milyones nga payola sa prangkisa sa telekomunikasyon; ug

·        Paggamit sa kuwarta sa PCSO alang sa mga kandidato sa administrasyon sa 2001.  [30]  leo_lastimosa@abs-cbn.com