Arangkada of Leo Lastimosa for June 10, 2008

            LABING DAKONG TULIS

 

            Makaluluoy nga paminawon ang mga tinun-an ug senior citizens nga nangreklamo nga gisupak sa PUJ drivers ang balaod nga naghatag nila og 20% nga diskuwento sa plitehan.  Bisan nagpakita sa ilang IDs, ug bisan klarong nag-uniporme ang mga tinun-an, gibalibaran gihapon sa mga drayber ang ilang hangyo.  Ang mga nangisog gisinghagan pa gani hinuon.

            Ang tanang mga reklamo nga nadawat, labi na kadtong nakalista sa license plate numbers sa mga sakyanan, ang uban gani nakakuha pa sa ngan sa mga drayber, amo dayong gisang-at sa LTO.  Kasagaran sa mga kaso wa hinuon motunhay.  Kay ang mga biktima wa pakita atol sa husay.  Mahimong gihasolan.  O nahadlok.  O mahimong igo na alang nila nga nakapahungaw sa ilang gibati.

-o0o-

            Nga maoy kinaham nga lusot sa LTO ug LTFRB nganong wa mapatuman ang diskuwento sa plitehan sa mga tinun-an ug senior citizens.  Gibasol nilang kakuwang sa pagpakabana sa mga biktima.  Apan kinsa may ilaron ning taphaw nga mga ahensiya?  Kon determinado gyong mopatuman sa balaod, daghan na unta silang mga drayber nga nakuhaan og lisensiya.  May mga sakyanan na man gani tingaling nalaksian nilag mga prangkisa.

            Napamatud-an na ning kanhi LTFRB 7 regional manager Manny Iway sa iyang panahon.  Nisakay si Iway sa PUJs ug gipapirma og complaint forms ang mga tinun-an (wa pa ang diskuwento sa senior citizens niadto) nga gihikawan sa diskuwento.

Kugihan si Iway.  Tapolan ug talawan ang mga nagsunod niya.

-o0o-

            Apan usa ka bahin sa akong kasingkasing makasabot sa hugtanong pagdumili sa PUJ drivers paghatag sa diskuwento.  Kay unsa man intawoy ilang atraso?  Nga sila may gipatikilid pagbayad sa benepisyo alang sa mga tinun-an ug senior citizens?

            Ang diskuwento sa plitehan gigamit sa mga politiko ug mga opisyal sa kagamhanan nga nagpa-pogi sa mga botante atol sa mga piniliay.  Nga angay lang.  Kay nagkinahanglan man gyod tinuod og tabang ang kabos nga mga tinun-an ug mga hamtong.  Apan yuna pa.  Nganong di man ang kagamhanan maoy nibayad ini?

-o0o-

            Usa sa mga hinungdan sa pagdumili sa mga botika paghatag og diskuwento sa tambal sa senior citizens mao ang kalangay sa BIR pag-uli sa dakong naiban sa ilang halin.  May sukaranan ang ilang protesta.  Unsaon man tinuod paglahutay sa ilang patigayon kon sa tapos pa sa tuig mahatagan og tax rebates?

            Kon nikisikisi ang mga botika, unsa pa kaha ang PUJ drivers nga wa gyoy paglaom nga maulian sa diskuwento nga ilang gihatag sa mga tinun-an ug senior citizens?  Isip labing dagkong mga konsumidor sa lana, silay gibunalan sa makalilisang nga buhis, nga kapin sa katunga sa presyo sa matag litro.  Inay pasalamatan sa ilang tabang pagbusdik sa nasudnong panudlanan, nganong gitulis na man hinuon sa atubangan?  [30]  leo_lastimosa@abs-cbn.com

Arangkada of Leo Lastimosa for June 9, 2008

       PABUROT SA TEXT

 

       Ang argumento sa mga kompaniya sa telepono nga ang text messaging sa Pilipinas maoy labing barato sa tibuok Asya tungod sa subsob nilang promotions dakong panlingla.  Ang ilang pangangkon nga ang promos nakalaslas sa presyo sa matag text ngadto na lang sa 13 sentabos dakong bakak.  Klarong natay-og lang sa pamostura sa Malakanyang nga kinahanglang librehon ang text messaging.

       Ang kamatuoran mao nga ang mga kompaniya sa telepono labihang dagkoa og ginansiya.  Nisamot kamakalilisang ang ilang pagburot human nahimo ang Pilipinas nga text capital sa tibuok kalibotan.  Karong nahulga ang dagko nilang ginansiya, modayon na silag pasidaan nga motibugsok ang kalidad sa ilang serbisyo kon maibanan ang ilang kita.

-o0o-

       Mapaubsanon kong mohagit sa telecommunication companies paglalis sa mosunod:

·        Napugos lang sila paglusad og promos tungod sa kumpetinsiya ug dili tungod sa ilang pagpakabana alang sa mga konsumidor;

·        Kon wa pa ang nakapahugyaw nga unlimited text ug call promo sa Sun Cellular, di mahitabo nga laslasan sa Smart ug Globe ang ilang presyo;

·        Bisan unsa pa kasubsob ug ka-agresibo ang promos sa Smart, Globe ug Sun, nagpabilin nga nalansang ang  karaang presyo nga P1 sa matag text gikan sa usa ka network ngadto sa lain, kay ang ilang mga gimik kapahimuslan lang sa text ug voice calls sud sa ilang network; ug

·        Ang teknolohiya sa mas baratong voice calls dugay rang namugna apan ilang gihikaw gikan sa mga konsumidor aron pagpabusdik sa ilang panudlanan.

-o0o-

       Sa wa pa mabungkag ang monopoliya sa telepono dinhi sa Pilipinas, ang mga konsumidor nga nanawag sa ilang mga kapamilya sa Estados Unidos gipahamtangan og P26 matag gutlo.  Karon, salamat sa kumpetisyon, nitidlom nang bayranan ngadto na lang sa P8 matag gutlo.

       Wa sila magtagad pagpangayo og pasaylo sa ilang pagpahimus sa mga konsumidor.  Di lang niadto.  Hangtod karon.  Kay ang mga tawag tali sa Pilipinas ug Estados Unidos nga moagi sa Internet, busa di na kapahamtangan sa gipaburot pag-ayo nilang termination fees, apan magamit sa kasarangang telepono ug di na magkinahanglan og personal computers, tag-P1 na lang matag gutlo.  O P1,000 matag buwan.  Depende sa subscription package nga pilion.

-o0o-

       Kadudahan ang tumong sa Malakanyang sa pagpanghudlat sa mga kompaniya sa telepono.  Labi na kay gawas nga nahimo ni human ang pipila ka dagkong mga magpapatigayon nipaluyo sa mga awhag nga pakanaugon na si Pres. Arroyo sa katungdanan, nagkaduol na sang piniliay sa 2010 ug nagsugod nang hiningusgang pagtigom og pondo alang sa nasudnong kampanya sa mga nangambisyon nga mobanos sa palasyo.

       Apan usa ni sa talagsaon kaayong mga higayon nga nitakdo ang kahakog sa mga politiko sa interes sa katawhan.  Di krimen ang pagpaginansiya.  Apan dakong eskandalo ang pag-insistir sa kinadak-ang tubo atubangan sa lapad nga katimawa.  [30]  leo_lastimosa@abs-cbn.com

Arangkada of Leo Lastimosa for June 8, 2008

       TAYTAYAN SA TABANG

 

       UP Grounds, Lahug, Cebu City—Samtang nagsuwat ko ini, nanghipos nang among kaubanan sa mga tolda, lamesa ug lingkoranan nga gigamit sa tibuok adlaw nga piyesta sa pangalagad, ang Grand Halad sa Kapamilya.  Naglingiting ang kainit sukad sa buntag hangtod sa hapon, gibalda lang sa daklit nga paglandong ug pagtaligsik.  Ang nagbawud-bawod nga kaliboan ka Sugbuanon wa hinuon magpabalda sa kahimtang sa panahon sa ilang determinadong pagtultol sa mga pangalagad nga gitanyag sa mga ahensiya sa kagamhanan ug sa pribadong mga institusyon.

       Labing nagbuntaog gikan sa akong nahimutangan ang E-Mobile van sa LTO, dental van sa Cebu City Health Department ug laboratory vans sa King Tupas Medical Services, Hi-Precision Diagnostics ug Reactive Medical Laboratory and X-Ray.  Naglibot sa upat ka ektaryang hawan sa UP Grounds ang mas daghang pangalagad nga nisangko hangtod sa ikatulong andana sa mga lawak saringan sa AS (Arts and Sciences) building.

-o0o-

       Pila ka buok ang mga Kapamilyang nagpunsisok sa tibuok adlaw?  Managlahi ang mga banabana.  Ang labing ubos nga ihap sa kapolisan 5,000 ngadto sa 6,000.  Ang labing taas 10,000.  Lisod ang tukmang pagtakda.  Bisan kon among gilista ang tanang naalagaran, may pipila nila nga nakapahimus sa daghang mga serbisyo, samtang ang uban, nga di sama kamapailubon, igo lang nilibot ug namauli nga wa malista.

       Kahatagan tingali mo sa mas matinud-anong hulagway kon atong iphon ang labing dagkong mga pangalagad:

·        1,500 ang nahatagan og libreng pangonsulta ug mga tambal;

·        1,000 ang nakapahimus sa libreng x-ray examinations;

·        500 ang naibtan og ngipon;

·        300 ang nahimoan og libreng pap smear; ug

·        250 ang nahatagan og libreng antipara.

-o0o-

       Laing kaliboan ang nakapahimus sa ubang laboratory services (ultrasound, EKG, urinalysis, CBC, cholesterol, blood sugar ug blood typing), legal services, welding demonstration, libreng pag-ayo sa cell phones, personal computers ug electronic gadgets, naalagaran sa NSO, SSS Philhealth ug PNP Desk, naka-renew og drivers license ug vehicle registration sa LTO, nakatambong sa housing loan seminar sa Pag-ibig ug sa ubang seminars sa backyard hog raising, game fowl raising, bread making, IELTS ug Hyperwage ug nakasaksi sa matahom nga mga pasundayag sa Wushu, Arnis, Eskrima ug Dancesport ug sa konsiyerto sa Nervestring Band.

       Ang mga nangapil nagikan sa nagkalainlaing hut-ong sa katilingban.  Ang masa nga nagbaktas.  Naghuot sang mga sakyanan sa UP parking lot ug nisuyla sa gawas, sa masigka habig sa Gorordo Ave.

-o0o-

       Ang Grand Halad sa Kapamilya usa sa highlights sa ika-13 nga anibersayo sa DYAB Abante Bisaya, sa Centennial sa UP ug sa tibuok tuig nga kasaulogan sa ABS-CBN Cebu sa ika-20 nga tuig niyang pagsibya ug pag-alagad.

       Salamat sa tanang nakatabang sa paghimo sa Grand Halad sa Kapamilya nga taytayan sa mga nagkinahanglan ug sa mga naa sa posisyon sa pagtabang.  [30]  leo_lastimosa@abs-cbn.com

Arangkada of Leo Lastimosa for June 7, 2008

       DUWA SA BUGAS

 

       Di katabang sa pagpakalma sa katawhan nga nasulbad nang krisis sa bugas ang paghinayon sa Malakanyang pagkuha sa baratong NFA rice gikan sa kamerkadohan.  Sugod karong adlawa, di nang kapalit ang kabos nga mga konsumidor sa tag-P18.25 matag kilo nga NFA rice.  Gipulihan na sa mas mahal nga US rice nga gibaligya sa tag-P25 matag kilo.

       Mas barato hinuon gihapon ang US rice kay sa commercial rice.  Nga ang kinabaratohan tag-P39 ang kilo, labihan pang dugmoka, ug ang kinamahalan naghadla-hadla na sa P50 matag kilo.  Apan di masabtan ang pagkuha sa mas baratong NFA rice gikan sa naandang NFA rice outlets tungod lang sa kahadlok nga mosamot pagtaas ang pila sa kamerkadohan.

-o0o-

       Ang P18.25 nga NFA gibalhin sa Malakanyang pagbaligya ngadto sa local government units, sa mga parokya ug mga Tindahan Natin.  Nga, nakatag-an mo, pulos way kasinatian sa pagnegosyo ug pagbaligya og bugas humay.  Busa kon sibaw ang reklamo sa pag-abuso sa pipila ka naandang NFA retailers, mas dako ang kahigayonan nga mausik ug magkayamukat hinuon pagsamot ang pag-apud-apod sa baratong bugas.

       Kon gipasanginlan ang NFA retailers sa pagpabor sa ilang kaparyentehan ug kahigalaan, unsa may garantiya nga di sab palabihon sa mga mayor ug mga gobernador ang ilang politikanhong mga dumadapig?  Kon nagbinuntagay nag pila ang mga konsumidor sa naandang NFA rice outlets, mas magkadusingot gihapon sila sa bag-o nilang pilahanan, kana kon matultolan nilang bag-o nga mga baligyaanan.

-o0o-

       Gibaligya sang US rice bisan wa pa matubag ang mga pagduda sa kaluwas ini.  May sukaranan ang kalibotanong mga kahugpongan sa pagpangayo og pasalig gikan sa Departamento sa Agrikultura nga di "genetically modified" ang bugas gikan sa Estados Unidos.

       Di ba diay mahinungdanon alang sa Malakanyang ang kaluwas sa mga konsumidor?  Di pa ba diay paigo nga gibunalan sila sa mas mahal nga bugas?  Karon gisugba pa gyong ilang panglawas sa pagkaon nga makabusog man tuod apan mahimong makadaot nila?

-o0o-

       Lisod sabton ang labing uwahing salida ni Pres. Arroyo kon atong kalimtan nga malampuson niyang gigamit ang krisis sa bugas sa paglipat sa katawhan gikan sa niulbong eskandalo grabeng kinawatay sa katigayonan sa katawhan nga gipasangil batok niya, sa iyang bana ug labing suod nga mga higala.

       Kinsa man tuod ang makapugong niya sa pagpaburot pa gyod sa krisis kon makahatag pa gyod ni og kahigayonan niya pagpakita sa iyang determinadong katakos pagpangu sa nasud ug pagpanalipod sa katawhan gikan sa iyang gitulisok nga mapahimuslanong mga magpapatigayon?

       Usa sa mga timailhan nga mahimong giduwaduwaan ra tang Arroyo mao ang kapakyas pagsilot ni bisan kinsang dagkong mga magpapatigayon bisan sa daghan nang mga ronda nga gilusad ug sa mas daghan nang pagarpar nga naluwatan batok sa gipasanginlang nagpaburot sa presyo sa bugas.  [30]  leo_lastimosa@abs-cbn.com 

Arangkada of Leo Lastimosa for June 6, 2008

            WAY BALIBARAN

 

            Kaingon ba nako nga, sa kataposan, nituman na gyong mga magtutudlo sa karaan ug kadaghan na balikbalika nga kamandoan sa Departamento sa Edukasyon nga boluntaryo ang tanang bayranan.  Ug nga ang kapakyas pagbayad sa mga amotan di babag sa pagkuha sa card ni sa pag-enrol sa mga bata.  Mingaw na man gud sa nangaging mga adlaw.  Lahi sa nangaging enrolment nga sibaw nang yangungo sa mga ginikanan ug mga tinun-an nga gibunalan sa pinugos nga mga bayranan.

            Maong dako nakong kahibung dihang nagsunudsunod ang mga reklamo nga nadawat sa Arangkada sa DYAB Abante Bisaya batok sa mga tulonghaang publiko nga namalibad paglista sa mga tinun-an nga wa kabayad.  Bato ba gyod diay ang ulo ug kasingkasing sa mga magtutudlo?

-o0o-

            Unang reklamo nga among nadawat gikan sa ginikanan sa Carmen, Cebu nga nakahukom nga paundangon na lang pagtungha ang iyang mga anak sa Carmen National High School.  Ang hinungdan?  Bisan giunsa niyag pakiluoy gibalibaran siya sa kadagkoan sa tulonghaan.  Ug bisan unsaon niyag paningkamot di gyod maabot ang bag-o ug karaang mga bayranan.

            Si Dr. Serena Uy, ang Cebu Provincial Schools Division Superintendent, nipasalig sa pagbadlong sa kadagkoan sa tulonghaan.  Gitawgan dayon niya ang prinsipal ug gipahinumdoman sa circular sa DepEd nga giapud-apod sa niagi lang buwan.  Nahibung si Uy nganong wa gyod gihapong kasabot ang pipila ka mga prinsipal ug mga magtutudlo nga "voluntary" na ang tanang amotan.

-o0o-

            Sunod nga reklamo gikan ni Duen Mesa, uyoan sa duha ka tinun-an sa Pusok Elementary School sa Lapulapu City nga wa hatagi sa ilang card ug wa gi-enrol kay utangan pa Graduation ug Homeroom Fees sa niaging school year nga P175 ug sa PTCA Fee nga P120.  Nidangop na siya sa Visayas Ombudsman niadtong Mayo 16 apan hangtod gahapon wa pa ma-raffle ang kaso.  Kay wa na man siyay ikaplite pagbalik sa Ombudsman, nga klarong wa magdali pagtabang niya, namasin siya sa Arangkada.

            Natawgan namo ang Lapulapu City Schools Division Superintendent, si Dr. Carmelita Dulangon, kinsa nitawag dayon sa prinsipal, si Ananias Manching.  Si Manching nipasalig nga gi-enrol nang mga bata ug di na sila mamugos pagkolekta sa mga bayranan.

-o0o-

            Laing suliran ang niabot sa atensiyon ni Uy:  Gibalibaran sa mga magtutudlo sa Consolacion ang mga tinun-an gikan sa ubang kalungsoran tungod sa kamandoan ni Mayor Avelino Gungob nga taga Consolacion ray makapalista tungod sa kahadlok nga magsugwak ang mga tinun-an.

            Gimandoan ni Uy ang mga magtutudlo pagdawat sa tanang mga tinun-an.  Way bisan usang balibaran.  Nga angay sang paminawon sa mga tagduma sa Lahug Elementary School sa Dakbayan sa Sugbo ug Basak Elementary School sa Mandaue City.  Kay labihan nilang nakabalibad sa late enrolees kay "puno" na kunong mga klase.  [30]  leo_lastimosa@abs-cbn.com

Arangkada of Leo Lastimosa for June 5, 2008

            PIYESTA SA SERBISYO

 

            Nadugangan pa gyod ang mga pangalagad nga kapahimuslan sa mga Sugbuanon atol sa Grand Halad sa Kapamilya tibuok adlaw karong Sabado, Hunyo 7, sa UP High School grounds sa Lahug, Dakbayan sa Sugbo.  Labing bag-ong napuno mao ang laboratory services sa tulo sa labing dagkong mga tambalanan sa Sugbo:

·        Ang Chong Hua Hospital motanyag og libreng complete blood count (CBC) alang sa unang 300 ka pasyente;

·        Ang Perpetual Succour Hospital motanyag og libreng urinalysis ug blood sugar screening alang sa 250 ka pasyente; ug

·        Ang Cebu Doctors University Hospital motanyag og libreng capillary blood sugar (CBS) testing pagsusi sa mga nagduda nga duna silay diabetes alang sa 150 ka pasyente.

-o0o-

            Mapuno sila sa nahauna nga labing dagkong mga laboratoryo ug mga tambalanan sa Sugbo nga motanyag sab og libreng mga pangalagad atol sa higanteng piyesta sa mga serbisyo karong Sabado:

·        Ang Cebu Woman's Club ug Cebu Puericulture Center and Maternity House motanyag og pap smear alang sa 300 ka pasyente;

·        Ang Hi-Precision Diagnostics nga motanyag og x-ray, urinalysis, blood culture, cholesterol tests alang sa 100 ka pasyente;

·        Ang Reactive Medical Laboratory and X-ray motanyag og x-ray ug blood typing alang sa 100 ka pasyente;

·        Ang King Tupas Medical Clinic nga motanyag og x-ray alang sa 100 ka pasyente; ug

·        Ang Cebu Ultrasound Pre-Natal Services Inc. (CUPSI) motanyag og ultrasound sa napu ka pasyente ug blood typing.

-o0o-

            Gipaabot nga kaliboan ka mga pasyente ang makapahimus sa libreng tambal ug serbisyo sa mga mananambal sa Cebu City Medical Center (CCMC) ug Philippine College of Physicians (PCP) ug mga pharmacists nga sakop sa Cebu Pharmaceuticals Inc.  Gatosan sab ang gipaabot nga libreng makapaibot sa ilang ngipon uban sa mga dentista sa Cebu City Health Department, Philippine Air Force, Cebu Dental Society ug San Vicente Parish sa Sambag 2.

            Inihap na lang ang mga adlaw sa gubaon nga cell phones, personal computers ug ubang electronic gadgets kay ang "Hi-Tech Men" sa Hi-Tech Ta, Bay ni Jun Tariman sa DYAB Abante Bisaya naglungutlungot na pag-ayo nila.

-o0o-

            Daghan nang naghinamhinam sa pagpahimus sa libreng welding demonstration ug 10% nga diskuwento sa matrikula sa BMC Training Center.  Gipaabot nga magbaha sang mga sakop sa Pag-ibig nga motambong sa Housing Loan seminar sa Pag-ibig sa mga dakbayan sa Sugbo ug Mandaue.  Mas daghan pa gyod ang magpila sa mga seminar sa BMEG ug San Miguel Mills sa Backyard Hog Raising, Game Fowl Raising, Gaffing Clinic ug Bread Making.

            Dugokan sab ang libreng IELTS orientation ni Tisha "Inday Tikay" Ylaya ug ang kontrobersiyal nga Hyperwage Forum ni JT Benz.  Ang mga kolorum malipay sang mahibawo nga makakuha silag cedula sa booth sa Cebu City Treasurer's Office.  [30]  leo_lastimosa@abs-cbn.com

Arangkada of Leo Lastimosa for June 4, 2008

            MARKA PATAKA

 

            Nahibung ang Malakanyang nganong mingaw ang reaksiyon sa mga ginikanan ug mga tinun-an sa kamandoan ni Pres. Arroyo nga di na pugson ang mga ginikanan sa pagpalit og uniporme alang sa mga tinun-an sa Grade One.  Ang tinuod mao, ug ambot nganong way nakahunghong ni Arroyo aron unta maluwas siya sa laing kauwawan, nga way uniporme ang mga tinun-an sa Grade One sa publikong mga tulonghaan.

Ang mahalon kaayo og mga uniporme mao ang mga tinun-an sa Grade One sa pribadong mga tulonghaan.  Apan sama sa iyang nahaunang kamandoan pagpugong sa usbaw sa matrikula, way mahimo si Arroyo pagpugos sa "deregulated" nga private schools pagtuman sa iyang mga sugo.

-o0o-

            Aron ba kaha pagbawi sa kauwawan nga nahiagoman ni Arroyo, si Education Secretary Jesli Lapus nipalapad sa iyang kamandoan.  Papason nang uniporme di lang sa Grade One.  O bisan sa elementary.  Kon dili hasta sa high school.  Apan mao lagi.  Ang publikong mga tulonghaan ra gihapoy ilang madaugdaog.

            Nganong mingaw man lang gihapon ang reaksiyon sa mga ginikanan ug mga tinun-an?  Nakatag-an mo.  Sama sa naandan, sama sa nangaging mga kamandoan nga klarong sangpotanan sa marka pataka nga mga panghunahuna unsaon paglingkawas gikan sa tulisok sa katawhan sa nag-anam kalisod nilang kahimtang, uwahi nang sugo ni Arroyo.  Nakapalit na ang mga ginikanan og mga uniporme.  Ang di pagpasul-ob sa mga uniporme maoy pag-usik-usik nga di nila kadangpan.

-o0o-

            Gawas pa, ug ambot nganong way nakahunghong ni Arroyo, si bisan kinsang may uniporme makasulti nimo nga mas makadaginot sila kay sa mag-ilis-ilis og mga sinina sa matag adlaw sa klase.  O sa trabaho.  Kay ang uniporme mahimong ibalikbalik pagsul-ob.  Nga way makabantay.  Gawas kon di magpabadlong ang imong ilok.

            Ang taphaw nga pagpanghilabot sa uniporme, sama sa mas taphaw nga moratorium sa usbaw sa matrikula, maoy labing uwahing mga tilimad-on sa ka-desperado sa pamunoan.  Pagkumbinser sa katawhan nga nagdugo ang kasingkasing ni Arroyo alang sa kinabag-an nga nahiagom sa nagkalapad nga katimawa.

-o0o-

            Mas lisod nga panalipdan ang pagpatuo ni Arroyo nga nibati siya sa kalisod sa mga kabos.  Human nabisto ang taho sa Commission on Audit (COA) nga mas dako pang iyang gasto sa paglaag-laag sa nagkalainlaing kanasuran sa kalibotan kay sa kinatibuk-ang suholan sa tanang mga kawani sa tanang mga ahensiya ubos sa iyang buhatan.

            Mas lisod tunlon ang nagbuntaog nga binuwan nga gasto sa iyang pinuy-anan nga giabaga sa kabos nga mga magbubuhis:

·        P4.6 milyones nga gasto sa pagkaon;

·        P4.5 milyones sa kuryente;

·        P2.1 milyones sa tubig;

·        P1.08 milyones sa seguridad;

·        P1.8 milyones sa telepono;

·        P2.7 milyones sa office supplies ug ubang supplies;

·        P4.2 milyones sa furniture; ug

·        P1.1 milyones sa office equipment ug ubang makinarya.  [30]  leo_lastimosa@abs-cbn.com

Arangkada of Leo Lastimosa for June 3, 2008

            HALAD SA KAPAMILYA

 

Malipayon kong motaho ninyo nga inanay nang nahingpit ang pangandam alang sa Grand Halad sa Kapamilya karong Sabado, Hunyo 7, sa UP High School grounds sa Lahug, Cebu City.  Motimaan ni sa ika-13 nga sumad sa DYAB Abante Bisaya, ika-100 nga sumad sa University of the Philippines ug ika-20 ka tuig sa pagsibya ug pag-alagad sa ABS-CBN Cebu.

Niang pipila sa mga pangalagad:

1.      Libreng PAP Smear sa 300 ka pasyente uban sa Cebu Woman's Club ug Maternity Hospital;

2.     Libreng Ultrasound uban sa Cebu Ultrasound Pre-Natal Services Inc. (CUPSI) pinaagi sa administrador, Dr. Amelia Abbu;

3.     Libreng bakuna ug kapon sa rehistradong mga iro ug iring uban sa Cebu City Veterinarian's Office.  Ang P150 registration fee mag-apil sa tag ug collar;

4.     Kapamilya Medical Mission uban sa Cebu City Medical Center, Cebu Medical Society, Philippine College of Physicians ug Cebu Pharmaceuticals Inc.;

5.     Libreng tambal sa Popular Feedmill Corp., Cebu Hong Tin Soy Factory ug Matahari Trading;

6.     Kapamilya Dental Mission uban sa Cebu Dental Society, San Vicente Parish sa Sambag 2 ug Philippine Air Force;

7.     Kapamilya Legal Mission uban sa IBP ug YLAC;

8.     Housing Loan seminar sa PAGIBIG;

9.     Libreng pag-ayo sa guba nga cell phones ug personal computers;

10.                       Libreng x-ray uban ni Dr. Warfe Engracia sa King Tupas Medical Clinic sa South Bus Terminal;

11.                       Libreng x-ray ug blood typing uban Reactive Med. Laboratory & X-Ray sa Mondejar Bldg., City Hall Road, Pusok, Lapulapu City ug Ma. Cristina Bldg., Fuente Osmena;

12.                       Libreng x-ray, urinalysis, blood ug cholesterol test sa Hi-Precision Diagnostics;

13.                       Libreng seminar sa Backyard Hog Raising, Game Fowl Raising management ug Bread Making sa BMEG ug San Miguel Mills;

14.                       Libreng Welding Demonstration ug 10% nga diskuwento sa matrikula sa BMC Training Center ni Dr. Edward Dampor Sr.;

15.                       Paghikay sa Drivers Licenses ug Vehicle Registration sa LTO Mobile E-Patrol;

16.                       Paghikay sa mga CEDULA sa Cebu City Treasurer's Office;

17.                       Libreng masahe sa Bright Pathway Blind Association;

18.                       Libreng Electronic Therapy Session sa Meditronics Health Clinic;

19.                       SSS application forms sa digitized SSS IDs;

20.                       Pangalagad sa NSO ug PhilHealth;

21.                       Libreng Calmoseptine ointment sa Calmoseptine Philippines;

22.                       Mass Feeding sa Bantay Bata 163 Cebu;

23.                       Newswriting Seminar/Workshop sa DYAB Radyo Patrol ug TV Patrol Central Visayas;

24.                       Hyperwage Forum uban ni JT Benz;

25.                       IELTS seminar uban ni Tisha "Inday Tikay" Ylaya;

26.                       Wushu and Tai Chi Demonstration uban nilang Francis Onglatco ug kaubanan;

27.                       Overseas Job Fair sa DMDP, POEA, OWWA ug DOLE pagtimaan sa Migrant Workers Day sa 3rd ug 4th floors sa EMall;

28.                       Mobile Passporting sa DFA sa EMall; ug

29.                       Paghikay sa NBI Clearance sa EMall.  [30]  leo_lastimosa@abs-cbn.com