Arangkada of Leo Lastimosa for March 11, 2008

            TIPIGANAN SA SUGBO

 

            Pila ka tug na lang ug mapahigayon na gyod ang gikahinaman nga "Kinaiyang Sugbuanon," ang paglab-as sa mga awit, balak ug ubang maanindot nga kalihokan sa mabulukong kagahapon sa Sugbo.  Karong Sabado sa gabii pasidunggan ang bantogang mga kompositor ug mga mag-aawit nga nakatampo sa pagpalambo sa mga kinaiyang Sugbuanon.  Nga gikahadlokang matabonan ug makalimtan na lang sa kakiat ug kagahob sa kabag-ohan.

            Si Dr. Jose "Sir Dodong" Gullas nagpasiugda sa kalihokan pagpasidungog sa nitaliwan niyang mga ginikanan.  Iyang tampo pagpabiling buhi sa atong kabilin.  Gihulagway ni Sir Dodong ang iyang paningkamot nga usa lang ka tulo sa luha sa kalaworan sa mga pagsuway batok sa dilang Sugbuanon.  Apan ang init nga paghangop sa kalihokan nagtino nga ang bul-og nga iyang gisugdan mokuyanap, manakod ug makapukaw sa mga Sugbuanon sa dako ug dinaliang panginahanglan pagpakabana pagluwas sa atong kasaysayan.

-o0o-

            Dungan sa mabulukong tulomanon karong Sabado, pormal sang ilusad ni Sir Dodong ang Tipiganan sa mga Handumanan sa Kinaiyang Sugbuanon Foundation.  Siyay motanyag og luna nga pahimutangan sa tanang tipaka sa kagahapon sa mga Sugbuanon aron nga di hingpit nga mawani ni makalimtan.

Ang tanang manambong sa "Kinaiyang Sugbuanon" gidasig pagdala sa ilang gihuptan nga karaang mga plaka, mga pamantalaan, mga libro, mga hulagway ug ubang bililhong kabtangan sa ilang katiguwangan.  Hatagan sila og opisyal nga resibo pagmatuod sa ilang pagpanag-iya sa kabtangan, nga butangan sa ilang mga ngan aron may kapasalamat ang umaabot natong mga kaliwatan sa ilang pagsuhid sa mga bantayog sa atong kaagi.

Ang di katambong sa kalihokan karong Sabado tungod sa di kalikayan nga kakulian giawhag sa pagda sa karaan nilang kabtangan ngadto sa DYAB Abante Bisaya o sa University of the Visayas (UV) aron nga malistang daan ang ilang mga tampo ug kapasalamatan sila atol sa paglusad ni Sir Dodong sa tipiganan.

-o0o-

            Ikaduhang hugna na ang pasidungog nga masaksihan karong Sabado.  Dason ni sa pagpasidungog ni Sir Dodong sa niaging tuig sa mga kabanay nilang 'Yo Karpo Ben Zubiri (Matod Nila), Vicente Rubi ug Mariano Vestil (Kasadya Ning Taknaa).  Ang mangu sa pasidunggan karong Sabado mao ang mga kapamilya nilang Dominggo "Minggoy" Lopez (Kamingaw sa Payag) ug Manuel "Maning" Velez.  Ilhon sab silang Max Surban nga naila sa iyang novelty songs ug si Kakoy Canete sa nga maoy nipaila sa arnis ngadto sa ubang kanasuran sa kalibotan.  Upat ka bantogang Sugbuanong mag-aawit pasidunggan sab:  Silang Erlinda Dajao Sayson, Novo Bono Jr., Al Comendador ug Jaime Salazar.

            Ang mga tiket nga tag P100 ug tag P50 lang mapalit gikan sa UV Alumni office, The Freeman, Banat ug Globe Telecom's Business Centers sa Ayala, SM ug Elizabeth Mall.  Ang "Kinaiyang Sugbuanon" ipahigayon sa Cebu International Convention Center (CICC).  [30]  leo_lastimosa@abs-cbn.com

Arangkada of Leo Lastimosa for March 10, 2008

PULOS NAGTAGO

 

Clark, Pampanga—Nagsige og bagulbol ang Malakanyang nga alkanse sila sa coverage sa media sa mga eskandalo nga gipasangil batok ni Pres. Arroyo.  Matod nila mas manggihatagon ang mga estasyon sa radyo ug telebisyon sa ilang airtime ug ang mga pamantalaan sa ilang mga pahina alang sa oposisyon.
    

Di na bag-o ang reklamo.  Maong karaan na sang tubag sa media.  Hatagan ta mo sa duha ka labing klaro ug labing kinaham kay di malalis nga mga panagang:  Una, nihit ang kasayuran nga nakuha sa media gikan sa mga opisyal sa kagamhanan; ug ikaduha, mas nihit ang ilang gitug-an nga kamatuoran.
               -o0o-
  

Unahon nato pagtuki ang kapangitaon sa kamatuoran sa kagamhanan.  Wa tingali molabaw sa kadangog sa kamatuoran sa Hello Garci scandal.  Hangtod karon, tulo ka tuig na human sa pagkabisto sa eskandalo, ug upat na ka tuig human sa piniliayng presidensiyal sa
2004, wa pa gyoy katin-awan nga giluwatan si Pres. Arroyo nganong nag-telebabad silang kanhi Comelec commissioner Virgilio Garcillano samtang nagpadayon pang iskutenyo.
    

Ang pagtak-om ni Arroyo nanakod sa ubang mga opisyal sa administrasyon.  Ang mga wa matakdi gibusalan ang baba aron di makatabi pinaagi sa EO 464 ug, dihang gibasura na sa Korte Suprema, sa executive privilege.
 Gawas nga islag sa kamatuoran, ang pamunoang Arroyo nilihay ug nitago pa gyod gikan sa tanang kahigayonan sa pagtubag.
              

-o0o-

Mao nga bisan ang labing yanong mga pangutana sa mga senador ug mga kongresista di nila tubagon.  Gipasanginlan hinuon ang mga magbabalaod nga namolitika ug nagtinguha pagpukan sa kagamhanan.

Bisan ang mga sakop sa media giduhig.  Ang igo lang nangutana ug determinadong naningil og mga tubag gitulisok nga nagpagamit sa oposisyon, mga komunista, mga rebeldeng sundawo ug, karong bag-o, mga terorista.  Inay tubagon, gipanggukod, giposasan, gitaral sa hukmanan ug ang pipila pintas gyod nga giluba ug gihunosan sa kinabuhi.


         -o0o-

Way sukaranan ang pangangkon nga inutil ang kagamhanan pagpanalipod sa iyang kaugalingon sa media.  Ang kagamhanan makapalihok sa iyang labing gamhanang makinarya sa propaganda.
      

Kinsa may nag-ingon nga Malakanyang ray makatubag sa mga pasangil?  Inay mag-usik-usik sa panahon pagpirma og mga manifesto pagsuporta ni Arroyo ug pagwaldas sa buhis sa katawhan pinaagi sa pagbayad sa mahalon nga full page advertisements, nganong di man suguon sa palasyo ang iyang alyadong mga mayor, gobernador, kongresista ug senador pagtabang pagtubag?  Bisan mao na lay bugti sa nagbaha nga mga pahalipay nga ilang nadawat gikan sa Malakanyang?
  

Kon mahitabo, inay mag-unay magkahiusa na silang Mayor Tomas Osmena ug Gobernador Gwen Garcia pagdupa ni Arroyo.  Kana kon kumbinsido silang putli ang pamunoan.  Ug nga wa lang sila motila sa Malakanyang kay gawas nga utro sab silang naglihay sa kahigayonan pagtubag may mga tinagoan sab nga di ganahang mahibaw-an sa katawhan.  [30]  leo_lastimosa@abs-cbn.com

Arangkada of Leo Lastimosa for March 8, 2008

          PASIUNANG KADAOGAN

 

          Sa di pa ka mahugno sa mga pasidaan nga ang mga protesta pagpangita sa kamatuoran sa NBN-ZTE scandal mahisama sa nangaging mga paningkamot pagsusi sa ubang gipasangil nga mga kahiwian sa kagamhanan, nga wa magpus hangtod nga natabonan sa mas bag-ong mga kontrobersiya ug nakalimtan sa katawhan, niang mga kadaogan nga nasakmit na sa katawhan:

·        Gikanselar ni Pres. Arroyo ang NBN-ZTE deal dihang nakabuylo nang imbestigasyon sa Senado ug gisang-at nang kontrobersiya ngadto sa Korte Suprema;

·        Nikalit lag kaabtik ang Ombudsman ug ang DOJ pag-imbestigar sa kontrobersiya human giyak-an ang mga kaso batok nilang First Gentleman Mike Arroyo ug kanhi Comelec chairman Benjamin Abalos nga gipasaka lima na ka buwan ang nilabay;

·        Gipapas nang Executive Order 464 tungod sa demanda sa CBCP ug ubang nagpakabanang hut-ong sa katilingban ug human gibasura sa labawng hukmanan ang duha ka labing mahinungdanong probisyon ini.

-o0o-

          Kasagaran ning maong mga kausaban gipatuman sa pamunoang Arroyo wa pay buwan human sa unang pagpakita ni Rodolfo Noel Lozada Jr. sa Senado.  Klarong natay-og ang Malakanyang sa paspas nga paglapad sa mga protesta human nitabi si Lozada.  Maong si Pres. Arroyo, bisan sa iyang pangugat nga pipila lang ang nagpaluyo sa mga protesta, nagkapuliki pagsablig og bugnawng tubig sa nagbaga nga mga pakisayod sa mga hut-ong nga niadto nitugot lang sa mga maniobra pagtabon sa gikuwestiyon nga mga transaksiyon.

          Salamat sa pagpakita sa braso sa militar ug kapolisan, sa mga bakak nga gisangyaw sa mga turutot sa Malakanyang ug, karong bag-o, sa mga pasidaan sa terorismo, ang gipangandoy nga gidaghanon sa mga tawo nga magtapok sa kadalanan wa pa makab-ot.  Apan gikuyawan si Arroyo kay gawas sa naandang mga walhon ug politikanhong oposisyon niapil na pagpaningil sa kamatuoran ang iyang kanhi mga alyado, apil nang iyang kaugalingong tulonghaan.

-o0o-

          Maong bisan supak sa kabubut-on napugos si Pres. Arroyo pagpasiugda og kausaban.  Nakahukom na bang magmatinud-anon?  O sama sa naandan nag-ulug-ulog lang?  Bisan unsa pay katuyoan, maahat si Arroyo pagpatuman og uban pang kausaban kon di molugak ang pagpakabana sa katawhan.

          Di mapatuman sa usa lang ka pamilok ang gipangayo nga kausaban sa sistema.  Ang ubang kausaban magkinahanglan gani og kausaban sa batakang balaod.  Apan ang nagkadaghan nga mga kanhi sakop sa gabinete nisugyot sa mosunod nga kausaban nga mapatuman ni Arroyo karon dayon:

·        Pagsuspenso ni Transportation Secretary Leandro Mendoza kansang buhatan maoy nagpasiugda sa NBN;

·        Pagsuspenso nilang Environment Secretary Lito Atienza ug PNP Chief Avelino Razon tungod sa gipasangil nga pagdagit ni Lozada sa NAIA; ug

·        Paghunong sa pagpanghasi batok ni Lozada ug sa iyang pamilya ug pagkiha na sa mga opisyal nga iyang gilambigit sa kahiwian.  [30]  leo_lastimosa@abs-cbn.com

Arangkada of Leo Lastimosa for March 7, 2008

          NGANONG SI LOZADA

 

          Kon nigawas si Rodolfo Noel Lozada Jr. tulo ka tuig ang nilabay, kanus-a niulbo ang labing unang higanteng eskandalo nga nakatay-og sa pamunoan ni Pres. Arroyo, di unta ingon ini kamahinungdanon ang iyang testimoniya sa kahiwian sa kagamhanan nga iyang naapilan.  Apan niadtong 2005, wa pay NBN-ZTE.  Samtang mas bug-at ang Hello Garci scandal, kay nahilambigit man ang ka-lehitimo sa iyang mandato nga nakuha sa piniliay sa 2004, apan ang pagtumaw sa saksi nga susamang Lozada niadtong higayona di unta makapugwat sa Malakanyang sama karon.

          Ang nakadapit sa pagtagad sa kinabag-an sa katawhan (92% sa mga nanan-aw sa "Harapan" tali nilang Lozada ug sa iyang mga gipasanginlan sa ABS-CBN sa tibuok nasud ang nituo sa iyang pasangil) mao ang pagtumaw sa iyang testimoniya human gibaraw ang tanang nangaging mga pagsuway pagsusi sa gikuwestiyon nga mga transaksiyon sa pamunoan.

-o0o-

          Di lang usa, di lang duha, kon dili tulo gyod ka impeachment complaints ang gibasura sa Kongreso tungod sa Hello Garci ug ubang mga eskandalo.  Naglaom unta ang katawhan nga matarung pagpatuman ang proseso nga mao ray bugtong paagi pagpaningil sa presidente nga, ubos sa balaod, di makiha sa bisan asang hukmanan samtang naglingkod pa sa Malakanyang.  Bisan nabasura pa untang impeachment complaints human sa makiangayong husay, di maukay og ingon ini ang katawhan sa expose ni Lozada.

          Apan wa tukia ang mga pasangil.  Wa hatagi og higayon ang mga nipasaka sa mga kaso pagpresentar sa ilang mga saksi ug mga ebidensiya.  Ang kinabag-an sa mga kongresista nga niluba sa mga kaso wa mopakita og bisan gamay  na lang pagpakaaron-ingnon nga gipasikad sa merito ang ilang hukom.  Way bisan usa nilang nagtagad pagsalimbong sa pagbaha sa kuwarta gikan sa liderato sa House ug sa palasyo wa pang binuntagay nga mga botasyon.

-o0o-

          Si Lozada kurakot.  Ug mananapaw.  Bisan wa pa matarung pag-detalye ang iyang mga anomaliya sa Philippine Forest Corporation ug sa iyang kaminyuon, giangkon nang Lozada nga may mga nahimo siya niadto nga nakapaubos sa iyang pagtan-aw sa iyang kaugalingon.  Si Lozada talawan.  Wa niya ilimod nga hangtod sa kataposang gutlo nagdumili unta siya pag-atubang sa mga senador.

          Silang kanhi Comelec commissioner Virgilio Garcillano ug kanhi Agriculture undersecretary Joc-Joc Bolante may kahigayonan sab untang mahimong Lozada.  Apan lahi ni Lozada gipalabi nilang kangitngit kay sa kahayag.

-o0o-

          Di ko andam modupa nga tinuod ang tanang sulti ni Lozada.  Apan sablig siya sa lab-as nga tubig.  Sa atong pangiyugpos atubangan sa nangalisbong pamakak sa mga politiko, si Lozada nipahinumdom nato nga di ta inutil pagbadlong sa labing dagkong mga opisyal sa kagamhanan.

          Maong labaw ni Cory, Erap, Ping, Villar, Roxas, Legarda ug ubang nitanyag pagpangu sa kampanya alang sa katarung ug kamatuoran, si Lozada ang gidumog sa mga tinun-an, mga batan-on ug ubang mga hut-ong nga nagpakahilokm sa nangaging katuigan.  [30]  leo_lastimosa@abs-cbn.com

Arangkada of Leo Lastimosa for March 6, 2008

          AREGLO SA NBN

      Atubangan sa nagkasunging pangangkon sa kadaogan sa Malakanyang ug Senado sa gisugyot nga pag-atubang ni Ched Chairman Romulo Neri sa mga senador basta nga di pangutan-on sa tulo ka pangutana nga wa niya tubaga dayong luwat sa arrest warrant batok niya, niang akong kabos nga hubad sa binayloay sa pamahayag sa mga maghuhukom ug sa abogado ni Neri nga si Antonio Bautista:
      Si Associate Justice Antonio Carpio nangutana, "Magamit bang executive privilege pagtabon sa krimen?"
Gihimakak ni Bautista nga si Neri nitabon og krimen kay gibutyag man gani niyang pagpanuburno ni kanhi Comelec chairman Benjamin Abalos.  Matod ni Bautista ang wa ibutyag ni Neri mao ang panagsulti nila sa presidente ipadayon bang NBN, usbon, o kanselahon, ug ang mga lagda sa pahuwam sa Tsina.
      Si Carpio nipahinumdom ni Bautista nga, "Ang pagpanuburno krimen ug di katabonan sa executive privilege."  Nitubag si Bautista nga silang Neri ug Arroyo nagtuki sa eskandalo, di sa pagsuburno ug nipasidaan nga mahimong maduhig ang mga opisyal sa Tsina.
      "Unsa may problema ana?," nisukna si Associate Justice Conchita Carpio Morales.
      Matod ni Bautista, "Kon ang pagpanuburno naglambigit sa mga opisyal sa Tsina, mauwawan ta."
      Si Carpio nipasabot nga kon may suburno, abagahon ni sa Pilipinhong mga magbubuhis kay ang NBN gastohan sa utang.  Nangutana siya, "Palabihon bang relasyong diplomatikanhon kay sa interes sa katawhan?  Kinsa may panalipdan sa hukmanan, mga Pilipinhon o mga opisyal sa Tsina?"
      Nidason si Associate Justice Consuelo Ynares Santiago, "Unsay mas mahinungdanon—pagtago sa komunikasyon sa presidente o pagbutyag sa kahiwian?"
      Si Bautista niinsistir nga itago ang komunikasyon sa presidente kay dunay laing tinubdan sa kasayuran sa giingong anomaliya, sama nilang Rodolfo Noel Lozada Jr. ug Dante Madriaga.
      Si Chief Justice Reynato Puno nangutana kon ang pagkanselar sa proyekto nisangpot ba sa diplomatikanhong panagsungi.  Niingon si Bautista nga natandog ang relasyon apan alang ni Puno lahi ni sa panagsungi.  Nabalaka si Bautista nga di na magpautang ang Tsina.
      Si Bautista niingon nga ang presidente di nang kasalig sa gabinete kon mapugos sila sa Senado.
 Silang Puno ug Carpio nisubay sa tulo ka pangutana sa mga senador.
      Matod ni Puno ang unang pangutana, Gisunod ba sa presidente ang proyekto?," nagsusi lang interesado ba siya di nga namugos siya sa proyekto.  Apan nipasabot si Bautista nga kon motubag si Neri, madaot ang presidente kay gi-piyestahan na siya sa mga pasangil.
     Sa pangutana kon gisugo bang Arroyo si Neri pag-una sa NBN, si Bautista niingon nga kon tubagon ning Neri, ang Pilipinas sawayon sa ubang kanasuran nga interesado sa transaksiyon.
      "Apan makaayo man kaha sa katawhan ang proyekto, nganong mahagsaan man sa langit ang presidente?," sukna ni Puno.
      Sa pangutana gisugo bang Arroyo si Neri pag-aprobar sa NBN human tug-ani sa panuburno, si Carpio niingon nga si Neri makabalibad nga di siyay moaprobar sa proyekto.  Matod ni Bautista kapasanginlan ang presidente nga namugos sa proyekto.  Apan si Puno niingon nga hunahuna ra ning Bautista.  [30]  leo_lastimosa@abs-cbn.com

Arangkada of Leo Lastimosa for March 5, 2008

          LAB-AS NGA SINUGDANAN

 

          Lisod tuohan ang pasangil ni Senador Juan Ponce Enrile nga nagkonsabo silang Rodolfo Noel Lozada Jr. ug Senador Panfilo Lacson pagpasud sa Malakanyang sa ilang laang ug pag-ilad sa katawhan.  Di lang ni tungod sa nangalisbo nga papel ni Enrile sa pagpahamtang ni Ferdinand Marcos sa martial law niadtong 1972 ug sa iyang pagtila karon sa lapalapa sa administrasyon.  Kon dili tungod sa abundang mga tilimad-on nga si Lozada di itoy ni Lacson o ni bisan kinsa:

·        Dihang gida sa mga tawong nikuha niya sa NAIA ngadto sa Cavite, nitug-an si Lozada sa mga senador nga nahadlok siyang mahimong laing Salvador "Bubby" Dacer, nga gipatay niadtong Nobyembre 24, 2000, kanus-a si Joseph Estrada ang presidente ug si Lacson ang hepe sa PNP; ug

·        Sa wa pa makigkita nilang Lacson ug Senador Jamby Madrigal niadtong Disyembre, nakigtagbo na siyang daan sa asawa ni Senador Joker Arroyo sa Septiyembre sa niaging tuig.

-o0o-

          Si Lozada hugtanon sang nagdumili pagpagamit sa mga politiko nga kaatbang ni Pres. Arroyo.  Bisan giunsa siya pag-ulug-ulog sa mga senador, si Lozada nagdumili pag-usab sa iyang testimoniya aron lang pagduot sa presidente ug sa iyang bana sa eskandalo sa NBN:

·        Si Lozada igo lang nibalik-balik nga wa siyang kakita sa direktang kalambigitan sa magtiayong Arroyo sa eskandalo;

·        Si Lozada niinsistir nga si kanhi Comelec chairman Benjamin Abalos ray nagsulti niya, apan wa siyang kadungog, nga si "FG" (Mike Arroyo) ang nipasalig pinaagi sa telepono nga mangutang nang Pilipinas sa Tsina aron madayon ang NBN ug pagkasunod adlaw (Sabado) nigawas gyod tinuod ang suwat sa embahada sa Tsina nga duna nay kuwarta alang sa proyekto;

·        Si Lozada nipasabot nga wa siyay direktang kasayuran sa papel ni Pres. Arroyo sa kahiwian gawas sa sulti nilang DENR Secretary Lito Atienza ug kanhi presidential chief of staff Mike Defensor nga si "Ma'am" nipasalig pagbayad ug pag-atiman niya kon mamakak atubangan sa Senado.

-o0o-

          Si Lozada nagdumili sab pagdason sa awhag sa nagkalainlaing mga hut-ong, apil nang mga pundok nga nanalipod niya, alang sa resignasyon ni Arroyo.  Bisan sa iyang dakong utang kabubut-on sa mga Obispo, kaparian ug mga madre, si Lozada wa managana pagsaway sa pagdumili sa CBCP pag-umol og mas kusganong baruganan batok sa pangurakot sa administrasyon.  Bisan sa mga pasidaan sa iyang mga tigpaluyo batok sa pamolitika sa militar ug kapolisan, si Lozada niawhag sa kasundalohan ug kapolisan sa pagbakwi sa ilang pagpaluyo sa kurakot nga pamunoan.

          Ang init nga paghangop sa mga batan-on ug mga tinun-an sa kawsa ni Lozada mahimong di lang tungod sa emosyonal niyang testimoniya sa Senado.  Kon dili mahimong nakauyon sab sila sa lab-as niyang mensahe alang sa kausaban.  [30]  leo_lastimosa@abs-cbn.com

Arangkada of Leo Lastimosa for March 4, 2008

          SILOT SA KAMATUORAN

 

          Maayong tilimad-on ang kainit sa paghangop sa mga tinun-an ni Rodolfo Noel Lozada Jr. sa bisan asang tulonghaan nga iyang giadtoan.  Ang mga tinun-an nga naminaw sa iyang mga pakigpung di ang naandang mga dagway nga makit-ang magprotesta sa kadalanan.  Ang ilang pagsalmot nakahatag og bag-ong kadasig sa mga kalihokan nga niadto gidominahan lang sa mga politiko ug militanteng mga kahugpongan.

          Maong samtang di ingon ana kadaghan ang nagmartsa sa kadalanan wa gihapoy tarung nga kinatulgan ang Malakanyang.  Mahimong ang magtapok pag-awhag sa pagpalagpot ni Pres. Arroyo di kaabot og usa ka milyon, nga gikatahong maoy gihuwat sa kasundalohan pagbakwi sa ilang suporta sa pamunoan, apan ang kalidad sa mga protesta motino nga di na makapaka aron ingnon lang ang palasyo nga way nahitabo human sa expose ni Lozada.

-o0o-

          Nalingla ba lang sa hilak-hilak ni Lozada ang mga tinun-an ug ubang hut-ong sa katilingban?  Tinuod bang sulti ni Senador Juan Ponce Enrile nga gisud lang ta sa bolsa nilang Lozada ug Senador Panfilo Lacson?  Nga ang pag-adto ni Lozada sa Hong Kong ug ang iyang pagpangayo og kuwarta gikan sa palasyo pulos kabahin sa script pagpakauwaw, pagtay-og ug pagpukan sa pamunoang Arroyo?

          Samtang di santo si Lozada, di mabasol ang katawhan nga mas motuo niya kay ni Enrile.  Kinsa mas unang nikumpisal nga kabahin sa script sap eke niyang ambush aron mamahimong usa sa mga sukaranan sa pagpahamtang ni Ferdinand Marcos sa martial law niadtong 1972.  Gawas pa, lab-as ang mensahe ni Lozada.

          Lahi sa bun-og na kaayong pagarpar sa kausaban ug kalamboan sa mga trapo, si Lozada nipahimangno sa kabataan ug sa ilang mga ginikanan sa di hingpit nga pagsandig sa ilang kasuko sa pangurakot kon dili, ug mas mahinungdanon, sa ilang paghigugma sa nasud.

-o0o-

          Maong samtang gipakpakan si Lozada sa nagkalainlaing mga unibersidad sa Metro Manila, gisuliyawan si Pres. Arroyo sa Laguna.  Nga mahimong masubli sa uban pang mga lalawigan nga iyang giangkon nga gipuy-an sa kinabag-an sa katawhan nga nahigugma niya.  Samtang nagkadaghan ang mga molupyo nga nidason na sa panginahanglan sa pagprotesta batok sa eskandalo sa NBN, padayong nitibugsok ang pagtan-aw sa katawhan sa bana ni Arroyo nga gipasanginlang maoy usa sa mga utok sa transaksiyon.

          Nigawas si Arroyo sa Metro Manila aron mapakita nga init pa ang pagpaluyo sa katawhan sa lalawigan.  Apan kon suliyawan na bisan asa siya padung, asa na man lang siya tago?  Gipadakop niya sa kapolisan ang mga nisiyagit og "Patalsikin si Gloria!" sa Laguna.  Unsa may kaso nga ilang ipasaka?

          Kasilotan ba tungod lang sa pagpadayag sa tinuod nilang gibati?  Mabilanggo na ba diay ron ang nagpakabana nga mga magbubuhis nga igo lang nipahibawo ni Arroyo sa kamatuoran?  [30]  leo_lastimosa@abs-cbn.com

Arangkada of Leo Lastimosa for March 3, 2008

        MOABOT RANG PANUDYA

     Napilde ba ang people power kay nagtungkawo gihapon sa Malakanyang si Pres. Arroyo bisan sa sunud-sunod nga mga protesta sa kadalanan batok sa iyang pamunoan? Moisa na ba sab ta, sa makausa pa, sa puti nga toalya? Sama sa atong gihimo human napakyas ang nangaging impeachment proceedings sa Kongreso batok niya?

      Alang nako wa mapilde ang people power. Wa makawang ang mga protesta sa kadalanan sa kaulohan, dinhi sa Sugbo ug sa ubang mga lalawigan. Bisan nagpabilin pa sa gahom si Arroyo ug ang iyang mga alyado, natay-og na sila sa sibaw nga mga protesta. Way sukaranan ang mga awhag nga mobalik na lang sab ta og pangiyugpos.

           -o0o-

      Ang mga protesta sa kadalanan, bisan kon wa mosangpot sa gitinguha nga kausaban sa nasudnong liderato, sama sa Edsa Uno sa 1986 ug sa Edsa Dos sa 2001, dunay duha ka lantip kaayong mga suwab:

• Una, nakapukaw sila sa nagpakabana apan nagpakahilom lang nga kinabag-an sa katawhan nga wa diay sila mag-inusara sa ilang kahimangod sa higanteng mga kahiwian nga nahimo sa kagamhanan ug nga daghan diay ang nisawo sa ilang mga pangandoy alang sa makiangayon nga kausaban; ug

• Ikaduha, napugwat ang kagamhanan nga di na diay nila mailad, malipat, mahaylo, mahudlat ni mabungul-bungolan ang nagmata na nga katawhan ug nga di na diay silang kapatuyang sa pagpaburot sa pribado nilang mga panudlanan ginamit ang ilang mga katungdanan.

           -o0o-

      Bisan kon sa makausa pa nakalahutay na sab si Pres. Arroyo sa lab-as nga mga pagsuway pagpalagpot niya sa gahom, di mahitabong mahilom na lang sab pagbalik ang katawhan. Ug mokalawat sa propaganda sa Malakanyang nga mas makaayo alang sa tanang hingtungdan ang pagpaabot sa pagkapupos sa iyang termino sa 2010.

     Hangtod nga di matubag ang mga pasangil sa pagpanikas, pagpamakak ug pagpangawat batok ni Arroyo, sa iyang bana ug ubang mga hinanib, di mahunong ang mga protesta. Busa di pang katug nga maghayang ang mga nagsagakay sa naapiki nga pamunoan.

           -o0o-

      Sa gusto niya ug sa dili, si Pres. Arroyo kinahanglang manubag sa mga nahimo ug wa mahimo sa iyang pito na ka tuig nga pamunoan. Kinahanglan niyang tubagon ang iyang pakigsulti ni kanhi Comelec commissioner Virgilio Garcillano. Kinahanglan niyang tubagon ang mga pagduda sa pagkawat sa iyang mandato sa piniliay sa 2004. Kinahanglan niyang tubagon gibutyag nga Jose Pidal bank account, fertilizer scam ug NBN-ZTE scandal.

      Di siya mapasakaan og kaso sa korte. May kaso na siya sa Ombudsman apan gikahadlokang di ning kairog. Ang makabungog niyang mayoriya sa Kongreso motino nga way impeachment complaint nga makadut niya. Ginawongan niya ang militar, kapolisan, simbahan ug ubang mga institusyon. Apan kay duna pa may kaangayan manubag siya ning tanan. [30] leo_lastimosa@abs-cbn.com